Gobierno a confirma cu Director di DIP ta suspendi pendiente investigacion

ORANJESTAD (AAN): Dialuna a habri cu e confirmacion oficial, cu e Director di Departamento di Infrastructura y Planificacion, DIP, a worde suspendi.

  Nan a suspende Haime Croes, pendiente un investigacion interno.

   Departamento di Infrastructura y Planificacion ta un departamento crucial den e desaroyo di nos pais, y tin ya varios aña cu hopi atraso. E servicio na comunidad hopi biaha a worde critica, debi cu hendenan ta wardando hopi aña riba un contesta riba nan peticionnan pa tereno, cambio di destinacion, prolongacion, etc. y no ta haya ningun contesta.

  Desde cu Ministerio Publico a para investigacionnan penal den e departamento dos siman pasa, e investigacionnan interno y administrativo cu a inicia den pasado, por a continua.

A suspende un empleado di DIP dos siman pasa y awor e director.

   Mientras tanto director interino di DIP lo asumi e liderazgo diario di e departamento y e lo worde asisti pa un “klankbordgroep” di algun otro hefe di departamento, den cual lo concentra riba reorganizacion di e departamento y elimina e atrasonan.

   E “klankbordgroep” ta un comision consistiendo di mas hefe di departamento, cu lo conseha den e proceso.

  Aruba ta den recuperacion, y na e momentonan aki mas cu nunca mester pa e departamentonan funciona optimal pa garantisa cu e desaroyo positivo por continua y resulta den progreso y bienestar di tur ciudadano.