Martijn Balkestein di Camara di Comercio
ORANJESTAD (AAN): Martijn Balkestein, Director Ehecutivo di Camara di Comercio, a elabora riba e Censo Economico, un conteo integral di tur compania cu ta activo den un pais. Un Censo Economico ta algo cu ta tur lugar den tur parti di mundo, pa asina inventariza e actividadnan economico, tambe ta midi e cantidad di empleado, si tin vacatura, e tipo di producto y servicionan cu nan ta brinda.
Segun Balkestein, un censo economico ta hopi importante, specialmente ora ta trata di un pais asina dinamico manera Aruba, di por tin tur dato actualiza. Esaki ta loke Centraal Bureau Statistiek (CBS) ta haci. KvK tambe tin datonan, pero tin cierto dato cu no ta disponibel, por ehempel, den caso di cantidad di vacatura, nan no tin e tipo di datonan aki. KvK tin cierto dato publicamente disponibel, pero tin cu cierto dato cu comision mes no kier comparti.
Verificacion di datonan tambe ta un punto sumamente importante, Balkestein a enfatiza. Esaki ta pa evita cualkier gañamento di informacionnan entrega. En berdad tin cierto informacion cu individuo y comerciantenan no ta 'gusta' comparti, y nan por ta sigur cu nan no lo forza pa haya e informacionnan aki. Pero e ta urgi pa tur cu ta participa den e censo, ta mas honesto y habri posibel. E participacion den e Censo ta obligatorio, mirando su importancia.
KvK ta conta cu bon cooperacion di varios departamento gubernamental, specialmente Departamento di Asuntonan Economico, cu asina un persona cu kier habri un negoshi na Aruba ta inscribi y Departamento di Asuntonan Economico ta duna su permiso, y nan ta cumpli cu tur rekisito pa habri un negoshi cu KvK ta exigi, e ora por inscribi un comerciante nobo. Den caso cu e persona ta naci na otro pais, nan mester bay na e departamento y KvK lo duna nan conseho pa otorga e permiso. Pa varios aña caba, KvK ta desaconseha pa habri Megastores, pasobra e tipo di companianan aki por kibra negoshinan chikito.
E Censo Economico ta importante pa planifica e direccion di e pais, specialmente den e sectornan cu a conoce un crecemento y otronan cu ta pasando dificil. Balkestein a indica cu un bon ehempel ta sector di servicio profesional, manera hurista, accountants, arkitecto, digital marketing, ingeniero, enz...ta un sector cu a crece, cu riba su mes ta un bon señal, pasobra e estudio ta basta largo, prome cu e persona por ta activo den nan ramo y consecuentemente nan ta genera mas placa. Un señal claro cu economia di un pais ta desaroya den un bon direccion.
Di otro banda, Balkestein a expresa, tin un deseo grandi di diversifica nos economia, pero segun nan datonan, no ta mustra cu ta logrando esaki, keto bay turismo ta keda e pilar economico di nos isla. Loke si e por bisa, cu den sector di energia renovabel, esaki si ta conociendo un crecemento.
