Gobierno a cende luznan di Pasco den Caya Betico Croes

ORANJESTAD (AAN): Temporada di fin di aña, di pas y amor, comprension y hermandad.

Diabierna anochi en conexion cu e temporada di Pasco, Prome Minister di Aruba mr. Mike Eman acompaña pa Minister di Turismo mr. Wendrick Cicilia a haci e acto oficial di cendemento di luz na Plaza Daniel Leo como tambe den caya principal di Caya Betico Croes.

   “Den e prome paseo den Caya Grandi, yena di iluminacion festivo, ta refleha e caminda cu pais Aruba ta riba dje, un caminda di yena speranza atrobe”, ta locual Premier Eman a expresa.

   Di su banda Minister Cicilia tambe a comparti su sentimento di mira Caya Grandi ilumina, cu ta simbolisa e vision cu Gabinete AVP-Futuro tin pa pais Aruba, pa Caya Grandi, na momento cu a cuminsa ehecuta diferente proyecto manera Ban back Caya cu ta refleha e speranza bibo, trece luz back den Caya cu enfoke pa trece bienestar na e comunidad, pa goberna na beneficio general di pais, di pueblo pa pueblo. “Un gobierno di Luz”, ta locual cu Minister Cicilia a indica.

   Pueblo ta expresa su alegria y ta mira e optimismo nobo cu tin na Aruba. Comunidad a mira atras, despues di un periodo di ocho aña di tempo hopi dificil den cual hopi cos a bay atras, perdida di poder di compra, barionan y centronan di ciudad pero awe comunidad por mira cu tin un gobierno cu tin atencion na e comunidad, for di mucha te na hende grandi.