Gobernador Alfonso Boekhoudt a bishita “Pier di Gobernador” na Barcadera

ORANJESTAD (AAN): For di algun luna caba, varios piscador y usuario di e pier cerca di ATCO, a haci un yamada na Santa Rosa pa renoba e  pier aki,

ta hopi uza pa piscador of usario di boto. Pero, pa motibo di e limitacion financiero, tabata dificil pa Santa Rosa so carga e gasto. Sinembargo, Sr. Mark Solognier y Sr. Bob Kelly di Kustwacht a haya informacion cu Marina Real tabata tin planea pa renova nan pier, a propone pa Santa Rosa haci e peticion oficial. Asina a logra cu a haci entrega di tur material na Santa Rosa, cu e proposito di inicia cu e trabounan di renobacion di e pier aki.

Algun dia despues, Majoor Abma y Majoor Fjeerdsma di Marina Real a manda contesta na Santa Rosa, cu nan lo haci donacion di e tur material pa Santa Rosa por continua cu e trabounan di renobacion.

Durante un audencia entre Su Excellencia, Sr. Alfonso Boekhoudt, Gobernador di Aruba hunto cu Sra. Nathalie Maduro, Director pa Santa Rosa, Gobernador Boekhoudt personalmente a haci e peticion un biaha mas na Santa Rosa, pa renoba e pier aki, pa motibo cu ta hopi ta esnan cu ta haci uzo di e pier aki, incluso su famia y su mes persona.  Gobernador a keda sumamente contento, na momento cu  Sra. Maduro a inform’e cu Mariniers Kazerne a haci donacion di tur material, mientras cu Kustwacht a bay di acuerdo pa coopera cu e luznan solar, pa mantene e pier safe pa esnan cu ta sali of drenta ora ta scur.

Un team traha di miembronan di ploeg di Santa Rosa, ta ehecutando e proyecto. Nan a desmantela e partinan kibra y reforsa tur hero y tur material colecta for di materialnan recycla den Santa Rosa mes. Diariamente Gobernador tabata tuma contacto cu Sra. Maduro pa follow up ariba e trabounan y a keda contento cu e cooperacion entre e 3 instancianan cu a aporta pa logra cu awe finalmente e pier a keda completa y tanto e como usuarionan haci uzo bek di esaki. Esaki tabata un  muestra di con ora instancianan coopera cu otro, e impacto por ta positivo pa un grupo hopi mas grandi y especialmente ora cu Gobernador tambe ta mustra su interes den un proyecto.

Pa conmemora e bunita proyecto aki y pa dune un nomber, a keda dicidi cu e pier pabou di ATCO lo carga di nomber “Pier di Gobernador”.

Diabierna ultimo, Gobernador a pasa personalmente pa bishita e pier un rato. Ela probecha pa gradici e miembronan di ploeg cu a traha incansabel te den ora nan laat di anochi, pa renoba e pier pon’e bek den funcion den un termino corto.

Mester remarca cu un usuario cu tabata presente na e momento ey, no por a keda di sin expresa su gratitud na tanto na e 3 instancianan como na nos Gobernador pa su peticion na Santa Rosa. Danki na esaki awe e pier ta completamente renoba.

Pa medio di esaki tambe, Gerencia di Departamento di Agricultura, Cria y Pesca, Santa Rosa, kier a haci uzo di e oportunidad pa esnan cu a coopera pa haci e proyecto un exito. Nan ta gradici Koningklijke Marine, Kustwacht y tambe na Gobernador pa nan sosten y atencion. Alavez ta pidi tur usuario pa porfabor yuda cuida e pier y evita di laga sushi atras ora di saca e botonan.