Evelyn Wever-Croes, Lider di Partido MEP a reuni cu Gobernador: - ORANJESTAD (AAN): Relaciona cu e ronda di consultanan cu Gobernador Boekhoudt cu a inicia for di mainta tempran, dialuna atardi a toca turno na Evelyn Wever-Croes den su posicion di Lider di Partido MEP.
Na salida di e reunion for di Kabinet di Gobernador, Wever-Croes a duna su impresion riba con e reunion aki a bay. El a bisa cu e reunion aki ta parti di e proceso di formacion.
MEP ta e prome partido cu a wordo invita pa sinta cu Gobernador Boekhoudt y den e conversacionnan aki a trece pa dilanti kico Partido MEP ta para p'e y kico nan ta dispuesto pa yega compromiso cu ne y kico pa MEP ta importante den un formacion como e partido mas grandi.
El a bisa cu e conversacion a bay bon y e contenido ta keda secreto. El a probecha pa gradici tur e 20,701 sostenedornan cu a yuda MEP gana eleccion y cu a haci Partido MEP e partido mas grandi di Aruba un biaha mas.
E lider di MEP a agrega cu Gobernador semper tin e prerogativa pa loke ta e formacion di gobierno. Pero no cu el a trece esey dilanti di tal forma, a remarca. "E ta mas bien scucha di e partidonan y den mi caso nos a splica con nos a mira e resultado di eleccion. Nos a sinti cu e pueblo a papia cla. Ami ta haya cu pueblo a duna un mandato cla y cu kier Partido MEP den gobierno, no mas cu otro partnernan den coalicion y esey ta locual cu nos ta buscando" Wever-Croes a expresa.
