Sondeo di DIARIO durante fin di siman tabata indica formacion hopi dificil - *Proceso di informacion historico mester proteha Aruba di trampa politico - *Espacio tambe pa Wever-Croes sigui cu gobernacion diario exigente di Aruba
ORANJESTAD(AAN) — Mientras e situacion di coriente na Aruba a bira e preocupacion mas grandi pa Pueblo, DIARIO a sigui monitor e desaroyonan politico local di acerca.
Den su edicion pa habri un siman cu lo presenta desaroyonan sumamente importante na nivel politico y gubernamental di e pais, DIARIO conscientemente a abstene di cualkier informacion cu por a wordo manipula y a spera e momento cu Gobernador Boekhoudt lo a anuncia con e proceso di informacion pa yega na un Gobierno nobo, lo a wordo atende.
For di Diabierna DIARIO a adverti pa tendencianan pa stroba e proceso electoral normal y crea problemanan politico, cu lo a mishi directamente cu e stabilidad cu Aruba mester pa e siman aki atende cu Hulanda, representa pa e Secretario di Estado Hulandes pa Relacionnan den Reino, Raymond Knops.
Na mes momento gobernacion di Aruba mester continua pa sigui percura pa e recuperacion economico di Aruba, di cual e bienestar di e ciudadanonan en general ta depende pa medio di e desaroyonan riba tereno economico y financiero.
Aruba ta enfrenta e parti importante di e proceso electoral, den cual e voto di Pueblo awor mester ta base pa yega na formacion di un gobierno cu ta cuminsa cu e etapa di informacion den cual tur partido ta wordo scucha y ta presenta nan pensamento pa yega na un Gobierno pa Aruba.
For di momento cu e resultado di eleccion tabata conoci, DIARIO a wordo informa di intentonan den cierto partidonan pa coopera cu Evelyn Wever-Croes, lider di e partido ganador di eleccion 2021 cu un mayoria di voto y asiento.
Si na 2017 Evelyn Wever-Croes a wordo forsa pa forma un Gobierno debi na e hecho cu AVP como partido ganador no kier a forma un gobierno di coalicion, na 2021 como lider di e partido ganador, Evelyn Wever-Croes na 2021 lo mester a bira informador y formador di e gobierno nobo. Un hecho cu a wordo confirma dor di e forma cu Pueblo di Aruba tambe a kita e titulo di votegetter for di Mike Eman y a entrega mayoria di voto personal na Evelyn Wever-Croes pa asina confirma cu Aruba kier Wever-Croes como lider.
For di siman pasa, DIARIO a mustra riba e necesidad di continuidad di gobernacion na e momentonan aki den un situacion politico sumamente tenso den cual atakenan ta wordo lansa riba e institutonan mas sagrado di democracia na Aruba y un tension enorme ta wordo crea na e pais.
Preocupacion sumamente grandi tin na tur nivel na Aruba, cu despues di eleccion 2017 mester a lucha contra e crisis financiero cu e pais mester a supera pa despues enfrenta e pandemia Covid-19.
E proceso di informacion lo a bira mas dificil pa Evelyn Wever-Croes debi na plannan cu tabata tin cerca mas cu un partido pa boycotea e formacion normal di gobierno cu Aruba a tuma como punto di salida y crea caos politico cu lo ta fatal pa Aruba den pleno recuperacion.
Gobernacion na e momento aki ta exigi pa Gobierno keda atento pa tur desaroyo mundial pero tambe pa sigui tur planificacion, guia y e acuerdo cu a wordo alcansa cu Hulanda y cu na prome luga mester percura pa regreso na un base sano di gobernacion di e pais y fortificacion di su raiz como Estado di Derecho.
Kico Gobernador lo a haci den e situacion y con e lo a atende cu e problemanan politico cu tabata pone un periodo di informacion trankil na peliger, tabata e pregunta grandi durante fin di siman.
E hecho cu ayera dos persona cu tur ingrediente pa percura pa un bon desaroyo di e proceso di informacion a wordo nombra, tabata un alivio grandi den tur gremio na Aruba y tambe cerca personanan cu tin interes di Aruba na pecho.
Tambe por nota cu a base di combersacionnan, partidonan politico mester duna un declaracion firme cu nan kier coopera pa formacion di un gobierno.
DIARIO lo sigui duna Aruba tur informacion y guia den un momento sumamente importante pa e pais, cu durante e proceso di votacion cu ta decisivo den e proceso electoral, a nombra Evelyn Wever-Croes como e gobernante cu mayoria kier mira pa dirigi Aruba cu te awe a haya eligio di instancianan internacional pa e forma cu a atende cu e crisis financiero hereda y di e pandemia Covid-19.
Na mes momento Wever-Croes lo mester actua tambe como miembro di Parlamento loke tambe ta exigi un temporada corto di formacion.
