Fondo Desaroyo Nobo San Nicolas enfrente Avestruz, Bo Aruba, Refineria di Aruba - *Caso penal mas grandi den historia politico a termina den compromiso - *Kico a pasa cu democracia na 2008 ora Mike mester a bira lider di AVP?
ORANJESTAD (AAN) — Diariamente un cantidad di ciudadanonan cu no ta cumpli cu ley na Aruba, ta den problema. Un tata di famia cu no por proba cu e zapato cu el a cumpra pa su yiu, no a wordo horta, ta den problema serio.
Awe cifranan ta wordo publica atrobe di cantidad di ciudadano cu ta wordo confronta cu hamber y miseria cu a wordo ocasiona dor di un pandemia despues cu un crisis financiero causa pa Mike Eman, ya a kibra e pais practicamente.
Berguensa ta cubri Aruba cu mester tin placa pa autoridad permiti Benny Sevinger, bay huramenta como miembro di Parlamento di AVP cu atrobe ta dal Aruba un bofta den su cara.
Mike Eman tabata hopi bon na haltura kico el a haci ora el a bay sconde na 2017 y a laga atras scondi den lachi di Benny Sevinger, e rapport Bo Aruba cu ta splica kico a pasa cu placa di Aruba na man di Mike Eman y Benny Sevinger.
Mike Eman asina no tabata presente den sala di Parlamento ora Algemene Rekenkamer Aruba a presenta e rapport final di Bo Aruba na Presidente di Parlamento na 2018.
Bo Aruba tabata un cantidad di proyecto pa un suma di 1.6 Miljard (1.6 Biyon) Florin di Pueblo di Aruba cu Miembronan di Parlamento a entrega na Mike Eman y Benny Sevinger sin ningun control, pa nan haci y deshaci y pone hunto cu e debe nacional cu ya Aruba mester a paga.
E rapport Bo Aruba a wordo traha a base di asuntonan cu Algemene Rekenkamer Aruba a descubri den un investigacion cu el a realisa. Un investigacion manera a wordo haci den pasado cu e nomber “Fondo Desaroyo Nobo San Nicolas” cu tambe tabata consisti di proyectonan pa San Nicolas, pero a bira fondo di corupcion.
Tabata na 2008 cu e caso a termina na un forma increibel cu a laga un sabor sumamente amargo atras enfrente AVP pero tambe e personanan cu e tempo tabata parti di Ministerio Publico.
Na 2001 Gobierno Henny Eman a bay cas. Na 2002 e investigacion di “Fondo Desaroyo Nobo San Nicolas” a cuminsa.
Algemene Rekenkamer Aruba a presenta un rapport cu a bay cas den man di Husticia di Aruba.
Ministerio Publico a start un investigacion contra Prome Ministro Henny Eman y tres ministro mas mientras bida tabata sigui den partido AVP.
Na 2008 Corte di Husticia a dicta sentencia y Henny Eman a sali liber, manera DIARIO mes a anticipa, pa falta di cuenta annual di Aruba.
Tres ministro di Gabinete Henny Eman a wordo sentencia dor di Corte di Husticia.
Ministerio Publico a apela e sentencia na fabor di Henny Eman y e tres Ministronan di AVP a apela nan sentencia cu tabata contene castigo penal.
Ta den e tempo aki, Mike Eman a cuminsa prepara su mes pa enfrenta Pueblo di Aruba como lider di AVP y gana e eleccion cu lo a haci cu el a bira Prome Ministro di Aruba na 2009.
Diripiente e casonan den apelacion a termina. Ministerio Publico a dicidi cu e no ta apela e sentencia di Hues den caso di Henny Eman y e tres Ministronan di AVP a dicidi cu nan no ta apela nan condena y castigo.
Aparentemente na beach tabata tin un abogado cu a atende cu un que otro cu un representante di Ministerio Publico y e caso a termina loke a habri porta pa Mike Eman enfrenta Pueblo di Aruba den eleccion 2009 y bira Prome Ministro di Aruba.
Esaki ta nifica cu Mike a gana eleccion cu un lucha contra BBO, mientras e caso den Corte den cual Ministronan di AVP tabata envolvi, a pasa pa pasado.
For di 2017 Mike tabata tin asuntonan mas importante pa Aruba pa atende. For di 2017 Aruba a cera conoci cu un rapport Bo Aruba, carga cu proyectonan cu tabata tin necesidad di tereno y contractonan cu companianan na Aruba.
Cuanto proyecto di Bo Aruba a keda tranca y nunca a bira realidad? Unda Mike tabata pa splica?
Awe Mike Eman ta grita den caso avestruz. Mike Eman a cubri Aruba cu berguensa pa insisti cu Benny Sevinger mester drenta Parlamento.
Ora Mike Eman a bira lider di AVP, tabata tin un caso penal den Corte contra Ministronan di AVP incluyendo Henny Eman. Awe Mike kier bolbe como Prome Ministro di Aruba. Tin un caso den Corte contra Benny Sevinger, cu hunto cu Mike a haci y deshaci cu 1.6 Miljard.
Tin motibo pa Aruba haci pregunta? Kico lo pasa cu resto di personanan den e caso Avestruz? Kico lo pasa cu caso Refineria di Aruba? Pregunta y mas pregunta den un poz di berguensa!
