Miguel Mansur: "Te ainda ningun hende no a sali for di Accion21" - *Leonardo Figaroa a anuncia retiro dialuna anochi
ORANJESTAD (AAN): Lider di Accion21, Miguel Mansur, a reuni dialuna atardi cu e Informadornan, esta Eddy Werleman y Tisa Lasorte.
Mansur a laga sa cu e reunion a bay hopi bon. "Realmente nan ta pidi tur e partidonan cu ken nan lo traha, cu ken nan no lo traha. Nos di Accion21 ta dispuesto pa traha cu tur partido. Realmente nos kier wak un base mas amplio posibel".
E implementacion di e landspakket ta un prioridad pa Accion21, mescos cu e reforma fiscal, igualdad y modernisacion di e 'kiesverordening', a enfatisa.
Partijraad di Accion21 a bisa cu nan no lo forma parti di ningun gobierno cu menos di 13 asiento y si nan no forma parti di gobierno, nan lo bay parlamento. No necesariamente den oposicion lo sostene gobierno ora ta den interes nacional y nan lo opone gobierno ora no ta den interes nacional, segun nan.
Accion21 ta abierto na un gabinete di vaksministers, un zakenkabinet y como ultimo opcion nan ta abierto na un gobierno di 14 asiento, a seָñala.
Mansur a laga sa cu el a combersa un par di biaha cu lider di partido MAS, Marisol Lopez-Tromp. Nan ta riba e mesun linea cu nan kier wak un base mas amplio posibel.
Cu partido RAIZ no a logra concreta un reunion y ainda ta wardando pa tende bek di nan, a indica.
Despues di e reunion di dialuna, a bisa, nan ta warda pa e proceso cana su caminda. E informadornan lo raporta bek na Gobernador y lo sigui tambe wak e discusionnan entre e diferente partidonan politico den e proximo siman.
KIEBRO DEN ACCION21?
Miguel Mansur a confirma cu ningun miembro a sali di e partido ainda y e no sa si esey ta bay cambia den e proximo dianan. El a expresa cu su rol como lider ta purba mantene e partido mas uni cu ta posibel y "semper mi lo actua lihe y sin misericordia pa salvaguardia integridad di nos partido. Esey no ta negociabel"
ULTIMO ORA:
Den oranan di anochi, e miembro di partido Accion21, Leonardo Figaroa a duna di conoce riba su pagina di Facebook cu desde dialuna pa 8 pm, e ta tuma su retiro y distancia su mes for di Accion21.
Durante eleccion 2021 a logra 190 voto y tabata ocupa e posicion number 17 riba e lista di Accion21. E tabata e di 3 candidato cu mas voto den e partido.
Esaki sigur ta un asunto cu ta crea inestabilidad den partijraad di Accion21. DIARIO lo sigui di cerca e desaroyo aki.
