Gisele-Mireille Sint Jago a finaliza su Bachelor den Ley

ORANJESTAD (AAN): Bon noticia sigur, esta cu e dama Gisele-Mireille Sint Jago kende den ultimo eleccion a aparece riba lista di Partido PP (Pueblo Prome), a finaliza su Bachelor den Ley.

   El a bisa cu durante e vakantie di scol, el a traha duro riba e dos ultimo materia cu e mester a caba pa keda cla cu su estudio di Bachelor di Ley na Universidad di Aruba. Siman pasa el a haya e resultado di su papernan, cu a haci’e hopi feliz. “Mi a logra finalisa mi estudio di Bachelor di Ley y por carga e titulo di LL.B. awo,” el a declara.

   Stage na Ombudsman St. Maarten:  Segun Gisele-Mireille St. Jago, tabata tin e honor di ta e prome studiante di Universidad di Aruba cu a a logra un stageplek na Ombudsman Sint Maarten.

   ‘Mi a traha un adviesrapport pa Ombudsman Sint Maarten, tocante e ultimo veredicto di Corte Constitucional di Sint Maarten, di dia 1 di November 2021. Mi tabata tin e honor di traha hunto cu Ombudsman Gwendolien Mossel, LL.M y su coleganan. Caminda Secretario General Mr. Randolf Duggins, LL.M y Legal Advisor Aishira Cicilia, LL.B tabata mi begeleider.”

   Loke el a descubri durante su investigacion huridico lo worde publica door di Ombudsman Sint Maarten. E investigacion cu el a haci den nomber di Ombudsman Sint Maarten y e rapport cu mi a skirbi, cu ta yama “Het Recht van de Zwakste!”, ta toca e derecho di autodeterminacion cu nos tin como un pueblo cu tabata full colonisa pa centares di aña largo. E nomber di rapport ta traduci como: “E derecho di esun mas debil.” Pa e investigacion y rapport di conseho aki, el a logra un 9 como eindcijfer.

   Bachelor Thesis di Ley: Fuera di esey mi a uza henter e vakantie pa skirbi mi thesis. Mi a scoge como begeleider mr. dr. Carel Smith di Universidad di Leiden. Un profesor masha renombra na Hulanda. E ta un gastdocent y ta duna un curso na Universidad di Aruba tambe.

   Pa caba cu su thesis, mientras e tabata traha riba e otro proyecto di Ombudsman, tabata un ‘careda contra holoshi’. Sinembargo, e tabata toca un topico cu semper e ta passiona di dje: Combati inhusticia! E titulo di mi thesis ta: “Nou Breekt Mijn Klomp... Eenheid in het minderjarige vreemdelingenbeleid binnen het Koninkrijk.” Unidad den Leynan di immigracion pa hobennan menor di edad den Reino.

   Den tur su 28 añanan den Enseñansa y como politico, el a topa masha hopi hoben, super intelligente y bon mucha. Tur tin soño di kico nan kier logra den bida.  El a nota un tristesa bao di esnan (menor di edad) cu tambe a nace na Aruba, pero cu no tin nacionalidad Hulandes. Nan ta cay bao di articulo 3 sub 1 paragrafo h di e LTU di Aruba y tin admission, ‘Van Rechtswege Toegelaten’.  Ora cu nan haal nan diploma di EPB, Mavo, Havo of VWO cu nan 16 of 17 aña, nan no ta cualifica pa por opta pa un paspoort Hulandes ainda. A base di e ley: Rijkswet op het Nederlanderschap, nan mester ta mayor di edad. Sin un paspoort Hulandes nan no por pidi un Aruba Lening tampoco, pasobra den e Landsbesluit Voorwaarden Studieleningen ta bisa cu bo mester tin Nacionalidad Hulandes.

   Pues, nan no por haya un Arubalening pa studia na EPI of afo. Nan no ta bin na remarke tampoco pa un fianza di studio di DUO y mester paga un suma di collegegeld cu ta cuater biaha mas halto ora nan yega Hulanda. Ademas ora nan sali for di Aruba y regresa back, nan mester warda dos aña pa por aplica pa un paspoort Hulandes a base di RWN.

   “Mi a repasa tur 5 ley di immigracion den Reino, tratadonan Internacional, Statuut y diferente Landsbesluit y a yega na un conclusion alarmante pa pais Aruba, pero cu lo beneficia tur nos hobennan. Mi Bachelor Thesis tambe a worde controla y mi a haya un 9 como eindcijfer.”

   Palabra di danki na Dios: Cu e dos puntonan aki, el a caba su studio di Bachelor di Ley. “Mi ta yama Dios danki pa e forsa y perseverancia cu el a brinda mi. Tambe mi ta gradici mi defunto mayornan Beulah Philips dfm y Marcelino (Chon) Sint Jago dfm pa e ehempel cu nan e duna mi di sigui studia henter bo bida largo. Danki na mi yiu Luciano, cu a uza mi mesun palabranan contra mi, pa motiva mi <3. Tambe danki na tur famia, amistad, colega y profesional cu na un of otro manera a sostene mi moralmente.”

   El a finaliza bisando: “Mi ta masha agradecido cu mi tin conosemento educativo y huridico awo pa yuda esnan cu mi por. Un palabra di motivacion na tur esnan cu ta pensando pa siña algo nobo, pa sigui un curso of estudio, pero ta sinti un poco insigur: “Bay P’e!!, Lo tin dianan bon y malo, per na final, e unico cos cu ta conta, ta cu bo a purba y bo a siña algo nobo!”

   Riba e potret saca na Ombudsman Sint Maarten, por mira d.r.p.d. Ayanna Guy, mr. Kelston Brooks, Florence Marlin, Ombudsman Gwendolien Mossel, mr. Randolf Duggins (S.G.), Gisele-Mireille Sint Jago LL.B, B.Ed, y Aishira Cicilia (L.A.).