Gino Goeloe ta celebra 20 aña den servicio na Wit Gele Kruis

ORANJESTAD (AAN):  Por a tuma nota riba social media cu Director di Wit Gele Kruis sr. Gino M. Goeloe ta celebra su 20 aña den servicio na WGK.

Trahadornan di WGK a desea Gino for di curazon un caluroso pabien pa tur e bon añanan di trabao.

Asina nan a expresa: "For di principio ora cu Gino a cuminsa traha na 2002, promer cos cu el a hasi ta di trece tur e personal hunto, pa tin union y profesionalismo na trabao y asina cada un den nan function ta bai nan bon.

Gino ta un director cu ta traha di curazon pa WGK y Aruba, semper yen di alegria y un sonrisa ariba su cara. Asina e sa di contagia cada empleado cu su carisma.

E ta gusta pa tur cos ta na ordu, cuminsa na e parti di bukinan di finansa te na bon mantencion di su edificionan, nan mester ta den bon condicion pa por sirbi tur clientenan di Aruba. Manera e sa bisa semper: “Un bon Servicio” y Nos edificionan agradabel” ta WGK su cara.

Tur organisacion cu bati na su porta e ta cla pa duna un bon conseho y un palabra di animo pa e proyecto cu nan ta kere den dje por triunfa, pasobra hunto nos ta logra. Hopi eyfornan por conta esey.

Gino den nomber di Directiva, Staff y Personal di WGK nos kier a bisa bo Danki pa bo esfuersonan y sigui pa hopi aña mas cu e bon trabao".

Masha pabien tambe di parti di DIARIO.

Potretnan cortesia di Facebook Page di Wit Gele Kruis