Den diferente conversacion y publicacion por tuma nota cu ta menciona Caya Grandi referiendo na Caya Gilberto F. ( Betico) Croes.
E nomber oficial di Aruba su caya principal ta Caya Gilberto F. (Betico) Croes cu ta core for e crusada di Schelpstraat/ Emmastraat te cu Rotonde di Santa Cruz.
E nomber di e caya a keda oficialisa dia 24 di Januari 1990. E prome nomber di Aruba su caya principal tabata Nassaustraat. Ta bon pa menciona si cu Caya Grandi tambe tin su lugar den curason y den vocabulario di e Arubiano y ta referi na Aruba su caya principal.
Tambe por bisa cu nos grandinan di antes tabata menciona Caya di Noord cu ta referi na Emanstraat.
Trafico den Emanstraat un tempo tabata core for pariba pa pabao cu un crusada na skina di ex-Texas Furniture Store. Caya di Zuid nos grandinan di antes tambe tabata usa pa den conversacionnan of ora ta referi na un direccion of locacion.
Caya di Zuid tabata referi na Wilhelminastraat cu ta cuminsa for di Rotonde na Banco di Caribe te cu crusada Kazernestraat y Havenstraat.
- Compila pa Roberto Croes • Nos Historia Nos Herencia
