Gianni’s Group cu Walk & Run pa contribui cu Ban Uni Man pa Yuda nos Muchanan

ORANJESTAD (AAN): Gianni’s Group ta bay organiza su prome Walk & Run, cu tin como meta pa recauda fondo pa Fundacion Ban Uni mas pa Cria nos Muchanan.

Esaki segun Gilbert Wernet di Gianni’s Group, durante un conferencia di prensa Diamars atardi.

El a sigui bisa cu tur placa gana cu venta di ticket ta bay pa e fundacion, cu ta percura entre otro pa desayuno na scol pa 816 mucha di menos recurso.

“Mirando cu e cantidad di mucha cu ta wordo yuda ta halto, esey kiermen cu ta dificil pa financia esaki”, segun Wernet.

El a splica cu a sinta cu presidente di e fundacion John Fun y asina e idea a lanta pa organiza e evento.

E Walk & Run ta bay ta riba 3 di December na Eagle Beach, unda cu tur hende ta sali for di parkinglot banda di Costa Linda, bay Divi Phoenix y bin bek.

Tur cos ta cuminza 5’or di atardi.

“E ta un fun 5K, pues bo por trece bo coleganan, bo amigonan y famia etc.”, segun Wernet.

Durante e conferencia di prensa Fun tambe a hiba palabra y el a bisa cu na e momentonan aki e 816 mucha ta haya nan desayuno na scol tur dia.

“Algun luna pasa nos a dicidi di bay publico pasobra ora cu nos a cera e aña escolar nos a ripara cu nos a cuminza coba den nos reservanan caba y cu nos no ta bay tin suficiente finanzas pa por cumpli pa resto di aña”.

Ora cu tur cos a indica cu nos lo tin cu bay corta gasto, a bin reaccion for di den comunidad y hopi empresa a saca un man pa yuda nos, segun Fun, kende a indica cu un die  empresanan aki tabata Gianni’s Group.

El a splica cu e fundacion ta hopi agradecido,  pasobra esaki ta bay yuda e muchanan inmensamente.

Pesey e ta haci un apelacion na pueblo henter pa pasa coopera si por y pasa un dushi dia.

Na e lugar mes por yena formulario pa contribui cu un standing order tur luna, pa aporta na yuda e muchanan.