Vocero di DIMP, Meverly Romano:
ORANJESTAD (AAN) — Den entrevista cu señora Meverly Romano, Relacionista Publico di Departamento di Impuesto Aruba (DIMP), el a declara cu dia 21 di November a keda como un fecha historico pa DIMP.
Ampliando e informacion, manera DIARIO a relata den su edicion di Diamars, Romano a splica cu 21 di November 2022, ta marca e cuminzamento di e procesamento masal di declaracionnan di Inkomstenbelasting di aña 2021.
Esaki ta nifica cu den mesun aña cu Departamento di Impuesto ta otorga e declaracionnan di 2021, y cu DIMP a ricibi bek di su contribuyentenan, e mesun aña aki nan ta procesa e cobranza (e definitieve aanslag) y esnan cu tin cu haya cen bek lo bay ricibi tambe den luna di December proximo.
“Esaki ta un logro hopi importante den historia di nos pais, eigenlijk, pasobra pa mas di 40 aña nos ta trahando cu un retraso cu tabata hopi dificil pa elimina, y pa esaki tabata tin varios factor cu a contribui na dje”, Meverly Romano a comenta.
El a cuminza pa menciona e problema di personal, cu DIMP no tin suficiente trahador den “aanslag regeling” pa por acapara e cantidad di contribuyentenan cu ta keda aumenta tur aña.
“Den transcurso di aña bo ta haya tambe cu na caminda por tin cambionan di ley importante, cu nos mester a warda un rato. Por ehemplo, na aña 92 cu a keda dicidi cu pa parehanan casa, cu nos ta bay atende cu entrada separa. Pa esey nos mester a forma un formulario di declaracion cu ta adapta na e cambio di ley ey”, Romano a señala.
El a agrega cu tambe den transcurso di añanan DIMP tabata tin proyectonan di automatizacion, den cualnan tambe e personanan di “Aanslag regeling” ta envolvi y tur ta factornan cu tiki, tiki a contribui na atrasonan na Inkomstenbelasting cu, sigur, no ta algo cu nan ni e contribuyentenan kier, ya cu esaki ta algo hopi frustrante.
“Bo por imagina bo, por ehemplo, cu na aña 2020 ainda bo ta bezig ta regel un aanslag di aña 2018 of 2017? Y cu si acaso e persona cu ta traha riba dje tin pregunta cu e tin cu haci na e contribuyente, esaki ta bay bisa cu esaki ta un par di aña atras caba y e no ta corda mes mas, kico a pasa. Of e persona, bo ta saca un aanslag pe, anto e tin un suma pa paga y e ta bisa bo ‘si, pero e tempo ey mi tabata tin un entrada miho; aworaki ta pensionado mi ta, mi no por paga e suma ey mas’. Kiermen, bo ta haya situacionnnan hopi fastioso den practica, ora cu bo ta traha cu un atraso di e forma aki ora bo tin un atraso di 4 of 5 aña”, PR di DIMP a subraya.
El a agrega cu den transcurso di e ultimo añanan aki DIMP a percura pa bin cu diferente plan di accion basa riba e maneho di su specialista den inkomstenbelasting y loonbelasting, cu ta señora Angeline Geerman-Giel, y claramente bao direccion di e director señora Luenne Gomez-Pieters.
“Pa nos por a elimina e atraso aki, nos tabata tin un maneho hopi rigido pero tambe mi tin cu bisa cu nos a haya hopi bon cooperacion di nos mesun coleganan, cu ta traha den aanslag regeling, cu ta envolvi no solamente den procesamento di aanslag pero tambe den cobramento di e belasting cu mester drenta”, Romano a indica.
El a remarca cu esaki ta un trabao di ekipo cu nan a haci ultimo tempo, pa nan por start cu aña 2021. Kiermen, e datonan di e declaracion di aña 2021, ta wordo hinca den e sistema automatiza. E prome aanslagnan lo bay sali ya caba na December. El a reitera cu esnan cu tin cu ricibi un suma bek lo haya esaki den transcurso di December. DIMP su enfoke ta pa continua asina na aña 2023 y sigui keda up to date.
