Giancarlo Jaïr Bermudez oficialmente cla como Peloton Commandant

Team Oirschot, 13 Lichte Brigade, 42 Bateljon, Eenheid 6 Zware Wapens

ORANJESTAD (AAN): Despues di 38 siman di un entrenamiento intensivo y desafiante, Giancarlo Bermudez a logra completa exitosamente su formacion como Peloton Commandant.

   Durante e entrenamento, entre otro, 26 siman a wordo dedica na entrenamiento fisico riguroso y 6 siman na entrenamiento di tiramento.

  E rutina tabata inclui movimento\kanamento di minimo 90 kilometro pa siman, incluyendo percurso cu camionnan militar pa simula situacionnan realistico di combate.

   E entrenamiento a tuma lugar den tereno natural (“mondi”), den zona urbano, na pia y cu vehiculonan movil. A train ofensiva\atake y defensa, poniendo enfasis riba situacionnan real, maniobra tactico y asumi responsabilidad bou presion.  Un aspecto esencial tabata e formacion di liderato bou circumstancia pisa.

   Como commandant nobo, Giancarlo a siña tuma decision rapido, asumi responsabilidad, lidera cu disciplina, fortaleza mental y fisico, y sobre tur cos, sirbi como un ehempel pa su grupo.

   E pregunta cu hopi hende ta pone ta: “Dicon e entrenamiento ta asina duro?” — y e respuesta ta simple: como commandant, bo tin e gran responsabilidad pa proteha bida di bo compañeronan.

Un Peloton Commandant ta lidera 4 sargente y cada sargente ta dirigi un team di 8 soldad, representando un total di 32 soldad bou su direccion.

   Riba dia 27 di juni 2025, Giancarlo Bermudez a “loop binnen” na Generaal-Majoor De Ruyter van Steveninckkazerne na Oirschot rond 8:45 di mainta, despues cu a sali for di su punto di salida e dia anterior pa 6’or di atardi.

   Cu gran orguyo, awo el a ricibi su certificado como Peloton Commandant.  Famia Bermudez-Daemen ta honra e esfuerzo, disciplina y entrega di Giancarlo, y ta desea su persona tur clase di exito den su carrera militar. Alavez ta desea su pareha, Lucy exito den su carera como piloto di helicopter. Lucy pronto lo cuminsa cu training ariba helicopter Apache.