GH Hoteles Venezuela ta inverti na Aruba cu nan hotel voco Surfside

Diahuebs tabatin inauguracion oficial

ORANJESTAD (AAN): Diahuebs anochi DIARIO tabata presente ora cu e compania GH Hoteles, cu ta un operador hotelero venezolano cu trayectoria solido den industria di hospitalidad, a celebra oficialmente e apertura di voco Surfside Aruba.  E etapa importante aki ta marca un paso strategico den e proceso di internacionalizacion di e compania, incorporando e concepto distinctivo di marca voco na su portfolio riba “One Happy Island”.

   E hotel ta forma parti awor di IHG Hotels & Resorts, un di e companianan hotelero lider na mundo, cu mas di 7.000 hotel na mas di 100 pais y cu un trayectoria di casi 80 aña den e industria.  Dentro di e ecosistema global aki, voco a establece su mes como un marca reconoci pa ofrece experiencianan contemporaneo, relaha y autentico, combinando atencion personaliza cu standardnan internacional di calidad y confiansa.

   Como parti esencial di e experiencia di e hotel, NOOK World Cuisine ta presenta un concepto nternacional di cena fusion cu ta celebra diversidad global uzando ingredientenan local fresco, tecnicanan moderno, y ambiente acogedor.  NOOK ta estableciendo su mes como un destinacion culinario nobo na Surfside, unda platonan internacional, mixologia artesanal, y diseño contemporaneo ta bin hunto pa crea un experiencia distinto.

   Durante e ceremonia di apertura, Claudia Escarrá, kende ta CEO di GH Hotelees, a comparti su entusiasmo pa cu e logro importante aki:  “Nos ta absolutamente feliz di a concreta e apertura oficial aki. Nos historia cu Aruba a cuminza 22 aña pasa, y pa yega awe na e punto aki cu voco Surfside Aruba, ta testimonio di un crecimento sosteni y di nos capacidad pa opera marcanan di clase-mundial.  Nos a evoluciona hunto cu nos huespednan, y e inversion aki ta refleha un vision di expansion dirigi pa hisa e standardnan di hospitalidad den Caribe.”

   E apertura oficial di voco Surfside Aruba ta marca un capitulo nobo pa hospitalidad na Surfside Beach, ofreciendo un experiencia di boutique premium, respalda pa e forza global di IHG Hotels & Resorts.  E proyecto ta combina diseño contemporaneo, gastronomia, cercania di lama, y un atencion personaliza y cercano, creando un experiencia alinea cu e expectativanan di e viahero moderno, mientras ta mantene e esencia autentico y relaha di Aruba.

   DIARIO ta felicita gerencia y ta desea voco Surfside Aruba sigui e ruta di revoluciona e mundo turistico pa e isla aun mas.