Gerlien Croes como Minister di Educacion a continua cu su bishita na scolnan na Paradera y Ayo

ORANJESTAD (AAN): Recientemente Minister di Educacion, señora mr. Gerlien Croes a continua cu su serie di bishitan na scolnan,

cu e meta pa papia cu educadornan, mira e facilidadnan di scol y mantene contacto directo cu alumnonan y personal di cada scol.

   E bishitannan ta forma parti di un ronda pa fortalece e relacion entre gobierno y sector educativo, y pa haya un bista real di loke ta pasando den e veld educativo tur dia.

   Recientemente, Minister Gerlien Croes a bishita Ayo Kleuterschool, Maria Goretti Dependance, Maria Goretti College y Scol Preparatorio Nos Paraiso na Paradera. Den tur e scolnan aki, e Minister a wordo ricibi cu energia positivo y entusiasmo, reflehando e compromiso di tur esnan involucra cu desaroyo di nos muchanan.

   Durante e bishitannan, Minister Gerlien Croes a tuma nota cu gran aprecio di e dedicacion di educadornan y personal di scol, kende diariamente ta traha pa crea un ambiente di siñamento sano, inclusivo y stimulante pa nos muchanan.

   Ministerio di Educacion ta reafirma su compromiso pa sigui traha man den man cu scolnan pa contesta nan necesidadnan y fortalece calidad di enseñansa na tur nivel.

   Cu e bishitannan aki, gobierno ta continua na duna balor na dialogo directo y colaboracion cu e sector educativo, reconociendo cu e trabao di nos educadornan ta esencial pa construccion di un futuro fuerte pa Aruba.