Dalgis Montalvo, Director:
- Docente y mayornan tambe a haya training tocante vape machine
ORANJESTAD (AAN)- Dalgis Montalvo, director di Stitching HUNTO, den entrevista cu Matutino DIARIO, a sigui elabora tocante e uso di vapers bao hopi di nos hobennan.
Montalvo a reitera cu nan a haya diferente caso. Esaki ta casonan cu sea e docente mes a mande pa HUNTO of akinan nan a tende cu tin muchanan a drenta hospital, y nan a bay wak con e situacion ta. Tin casonan di mucha cu den gang nan a bay uza esaki.
Dalgis Montalvo a referi tambe na un caso specifico, cu ta un grupo di alumno di Examen Klas cual en principio nan mester a wordo kita for di scol, mirando cu nan a test positivo tambe.
“Kico nos a haci pa e muchanan aki no perde scol? E ora ey nos a sinta cu e docentenan di scol, y nos a bay over na duna e muchanan aki un trayecto ambulatorio cu psico-educacion, puntra nan kico nan ta usando, pakico nan a uza esaki, kico ta e efectonan di e substancia aki, y tambe nan a envolve e docentenan y e mayornan, cu tambe a haya un training tocante e uso di substancianan peligroso. Nos a cera un contract, eigenlijk pa e grupo aki, cual nos tin cu bisa cu a bay hopi bon, e muchanan por a caba nan scol tambe, nan por a presenta nan examen, y te ainda nan ta clean”, Dalgis Montalvo a relata.
El a señala cu den e caso aki HUNTO a pone bek e muchanan riba e bon caminda, yuda nan pa bay scol bek, alerta scol y e mayornan, pasobra nan no tabata sa mes cu nan yiunan tabata uza substancia. “E guia, papia cu bo yiu, e confianza cu bo yiu, ta e partinan cu tambe nos ta mira cu ta cardinal tambe. E no ta solamente problematica di e mucha cu ta yega na uso di substancia, pero tambe kico tur tin rond di e mucha aki cu ta pon’e bay eynan”, Dalguis Montalvo a subraya.
Tin factornan manera e media, e trendnan, e kier ta tough, e kier haci algo otro, e kier ta bezig, pero no sanamente bezig. “Dus, tur esaki ta factornan cu nos ta mira cu den nos hubentud tin hopi necesidad, no ta solamente den e parti aki di vaping, pero kico ta pasando cu nos hobennan”, Dalgis Montalvo, director di Stichting HUNTO a remarca.
