Na cual empresa priva e situacion aki lo por a sigui existi?
*Ya como candidato di partido contra Gobierno e mester a retira?
*Como Raiz difunto den Gobierno y como Futuro den Parlamento
ORANJESTAD(AAN)—Cu leynan mester ta basa riba principionan clave, ta un asunto cu sigur mester ta base den Representacion oficial di un Pueblo, cu por cambia di opinion entorno su representante, pero nunca riba materia basico pa su pakete di balor.
Loke ta pasa actualmente den seno politico di Aruba, sigur ta motibo di critica pasobra un situacion inaceptabel ta presenta su mes.
Un politico ta basa su mes ariba su principionan y pensamentonan den ehecucion di su labor como representante di Pueblo, cu ta e instancia cu ta paga su salario mensualmente y ta pone den un posicion pa e ehecuta su tarea.
Democracia ta directamente basa riba e deseo di Pueblo cu ta haya expresion den eleccion pa loke ta trata representacion di Pueblo den Parlamento y den Gobierno.
Loke ta pasa e momentonan aki na Aruba, no ta duna indicacion cu representacion di Pueblo ta bon regla, pero mas bien ta parce un bom atomico cu ta rementa den seno di e curazon politico di Aruba.
Un bom atomico ta caracterisa su mes pa e hecho cu atoom por splits y asina causa daño na tur loke ta parti di su ambiente.
Ta como miembro di e partido Raiz, Geoffrey Wever a haci su entrada como Ministro di Gabinete Wever-Croes 2 cu pa e cantidad di 9 asiento cu MEP tabata tin e tempo cu el a forma e gobierno, mester a haci Raiz su partner pa e por tin mayoria den Parlamento di Aruba.
Na 2024 tabata e partido Raiz na cual Geoffrey Wever originalmente tabata afilia, cu a pone un fin sin ningun necesidad evidente, na Gabinete Evelyn Wever-Croes.
E partido di Geoffrey Wever a crea un incidente politico, cu mester a conduci na caida di Gobierno Evelyn Wever-Croes.
For di e momento Raiz a forma parti di oposicion contra MEP, aunke el a keda cu su dos Ministronan y hasta a trata na yuda destrui e imagen di Prome Ministro Evelyn Wever-Croes cu un reunion den Parlamento, caminda Raiz hunto cu e partidonan di oposicion di entre otro Futuro y AVP, no a logra destrui e impresion tan positivo di Evelyn Wever-Croes na Aruba, den Reino y na mundo.
Pues Geoffrey Wever te awe a base di e hecho cu e tabata parti di Raiz y a sigui conta cu sosten di Raiz, ta Ministro di Aruba en espera di un Gobierno nobo, den cual atrobe e lo bira Ministro, pero awor pa representa partido Futuro di cual e ta co-lider.
Cu otro palabra Geoffrey Wever, como miembro di Gobierno Evelyn Wever Croes, ta tumando decisionnan pa economia di Aruba, cu ta nifica cu e ta dicidi pa e alma di produccion material cu mester sostene Pueblo di Aruba.
Na mes momento e ta wordo nombra como e Ministro di e Gobierno nobo cu ta wordo forma dor di Gerlien Croes, lider di su partido nobo cu ta futuro y kende ta co-formador di e Gobierno nobo entre Futuro y Mike Eman.
No por papia di un situacion ilegal of contra ley, pasobra nunca ley a tuma un decision asina na consideracion pa asina haci cambionan necesario den un situacion cu no ta normal.
E pregunta mester wordo haci na cual compania lo a permiti Geoffrey Wever atende cu futuro di e compania como un director di e compania y na mes momento ta traha pa otro compania, cu lo reemplaza e compania pa cual e ta traha actualmente.
Raiz ainda tin dos Ministro cu mester bay cas ora bini cambio di Gobierno. Raiz a stop di existi pa loke ta trata posicion politico despues di eleccion pero ainda tin Ministro, di cual uno ta Ministro Geoffrey Wever cu continuamente ta den publicidad cu proyectonan di Aruba cu ta wordo ehecuta.
Por papia di un situacion normal? Por papia di un situacion democratico, segun e concepto mas profundo di democracia?
Hamas den historia Aruba a conoce un situacion similar. Ta esaki ta e motibo aparentemente cu no tin ley pa atende cu loke ta pasa y mester wordo acepta den un situacion increibel, cu ta haci hende puntra kico a pasa cu democracia real.
Gobierno Wever-Croes ta bay cas pa sigui tuma nota di e actividadnan cu lo continua dirigi pa Geoffrey Wever, no como Raiz cu ya a muri, pero como Futuro, su partido den futuro!
E pregunta final pues ta keda cu si atoom por splits, pakico un politico no por splits y fungi como Ministro (cu ta dirigi base economico di e pais) pa un partido cu no a haya sosten di Pueblo den ultimo eleccion, pa despues e bira Ministro di un partido cu awor a cuminsa existi!
