Geert Wilders no tabata sinti suficiente sosten pa loke ta su plan pa limita asilo

ORANJESTAD (AAN):  Dialuna caba tabata tin un indicacion fuerte cu e gobierno Hulandes no lo wanta mucho tempo mas,

mirando e expresionnan di lider di PVV Geert Wilders, kende a bisa cu e no ta sinti cu e tabata haya suficiente sosten pa loke ta su plan pa limita asilo.

“No tabata un bon combersacion, Wilders a bisa despues di e reunion cu Yesilgöz, Van Vroonhoven y Van der Plas. “Nos mester limita e migracion di asilo y si nan no sostene mi, nos lo tin un problema serio”, ta locual Wilders a bisa Dialuna.

Diamars el a haya ta suficiente y el a ranca e plug di e coalicion.

Esey a pone cu Prome Minister Dick Schoof  Diamars mes a bay na Rey Willem-Alexander pa entre retiro di e gabinete.

El a indica si cu e lo sigui cu e lidernan di VVD, NSC y BBB.

Tabata tin diferente speculacion, pero e hecho cu PVV a sali for di e coalicion, ta nifica cu e gabinete actual no por sigui mas den gobernacion.

“Cu salida di PVV no tin suficiente sosten den Kamer pa e gabinete aki”, Schoof a bisa despues di un ministerraad special di ultimo ora.

“Si cerca un partido e deseo no tey pa continua, bo no pro sigui cu otro mas”, segun e ex Prome Minister di Hulanda.

Awor lo mester bay prepara pa un eleccion nobo, despues cu e gabinete saliente no a ni sinta 1 aña.

E ultimo eleccion a tuma lugar riba 22 di November di 2023, pero tabata te 2 di Juli di 2024 cu e gabinete a sinta.