Conferencia ICMS a tuma lugar na Universidad di Aruba:
ORANJESTAD (AAN): Manera ta conoci, e Conferencia Internacional di Ciencia Marino 2025, (ICMS), IOCARIBE, a tuma lugar e dianan 26 y 28 di Mei ultimo, na Universidad di Aruba.
Profesor Titular di Universidad di Colombia, Jose Ernesto Mancera Pineda, den entrevista cu DIARIO a señala cu e tambe ta forma parti di ANCA (Academia Nacional di Ciencia Ambiental), cu ta un grupo cu ta ocupa su mes den trata di compronde e florecimento dañino di alganan marino.
El a splica cu e florecimento di alga ta procesonan natural cu ta wordo genera den tur lama sea cayente of frio, pero cu e indicacion ta cu esaki ta aumentando.
“Pakico nan ta aumentando? Debi na e cambio climatico of, basicamente, door di e aumento di temperatura ambiental. Cual ta e problema? E eventonan aki ta haci cu lama ta cambia di color, y bira cora. Pues, nos ta papiando di florecimentonan cora. Pero tambe nan por ta toxico, y akinan ta surgi e problema pa nos, e sernan humano”, Profesor Mancera Pineda a relata.
El a agrega cu ora nos come un pisca, e por ta hopi fresco y dushi, pero e por tin toxicidad, y incluso, por causa morto. Esaki debi na e Syndrome Ciguatera, causa pa pisca contamina cu alganan toxico.
