Uno di e preguntanan cu mayoria den comunidad no kier haci
*E lo no tin e holor di perfume tan atractivo di gasolin
*E heroe economico di futuro ta invisibel y ainda desconoci
ORANJESTAD(AAN)—Uno di e problemanan mas grandi cu e ser humano tin, ta sconde den su berguensa pa splica cu e no por comprende un palabra of algo cu ta wordo presenta na su persona.
Esaki ta haci cu loke merece splicacion no ta haya splicacion loke ta nifica cu hende no ta comprende di kico ta papia y pakico e mester bati man.
Periodismo rond mundo mester tene e realidad aki na consideracion pa asina encamina e proceso di informacion na un pais.
Cu “hidrogeno” lo mester habri caminda pa un futuro di stabilidad economico pa Aruba, ta algo cu tur hende mester aplaudi pasobra pronto petroleo lo mester despedi segun plannan internacional.
Ta sumamente importante pa Aruba cu a bandona buskeda di refineria di azeta, aunke na diferente parti di mundo ainda tin refineria di azeta ta habri pa trata na haci ganashi prome cu petroleo mester despedi.
Pues por papia di un paso cu ta duba stabilidad pa drenta futuro di Aruba, cu sigur ta un logro grandi pa Gobierno actual.
Pero nos ta bolbe na e motibo di e columno aki.
Ora splica publico cu hidrogeno lo reemplasa petroleo como entrada di Aruba, mester cuminsa introduci Pueblo na e esencia di hidrogeno.
Hidrogeno ta algo manera gasolin? E tin mes holor dushi, cu manera mundialmente ta wordo afirma, tin un atraccion pa hopi hende?
E tin e color di petroleo?
Ban splica cu hidrogeno no tin color ni holor. E ta un producto sumamente limpi cu hende no por mira pero cu ta combustibel.
E no tin holor. Pero e ta capaz na kima ora e topa cu oxigeno, cu ta loke hende ta respira.
Por uza hidrogeno den auto, na cas y na diferente forma cu mester bira parti di e informacionnan cu sin duda lo mester mira luz prome cu hydrogeno mes haci su entrada.
Importante ta bira si, pa duna un curso cortico pa medio di tur medio di comunicacion riba hidrogeno y tur loke ta relevante pa asina e por bira topico di combersacion pa henter comunidad, cu sin duda lo progreso cu hydrigeno aunke e no ta na haltura ainda kico exactamente ta hydrogeno!
