Gasolin lo baha cu 25.2 cent entrante 14 di september

Minister Geoffrey Wever:

ORANJESTAD (AAN): Durante conferencia di prensa diahuebs mainta Minister di Asuntonan Economico, Comunicacion y Desaroyo Sostenibel, mr. Geoffrey Wever a anuncia cu entrante 14 di september, Gasolin lo baha cu 25.2 cent (-8.6%), Diesel lo baha cu 8.5 cent (-3.1%), y Kerosin lo baha cu 9.7 cent (-3.8%).

            Minister Wever mescos cu comunidad henter ta contento di mira e rebaho aki. Ya caba di luna pasa por a cuminsa mira e trend aki riba mercado internacional ora prijs pa bari di Diesel y Gasoline tambe a cuminsa baha. Minister Wever hunto cu Gobierno di Aruba ta spera cu e trend aki por continua, cual lo ta na beneficio di tur.

            Mercado internacional a recupera for di e shock inicial di prijs causa pa e inicio di guera na Ukraine, pero ainda ta ser afecta completamente pa desaroyonan internacional. Ta premira un stabilisacion pa awo, mientrastanto Gobierno di Aruba lo sigui enfoca riba reduccion di dependencia internacional y desaroyo mas sostenibel posibel.