Un haraña golos pa placa a move ocho aña den Gabinete Mike Eman???
*Interes mundial pa caso penal cu Miembro di Parlamento como acusado
*Un solo Ministro ocho aña largo por a haci negoshi cu tereno di Pueblo??
ORANJESTAD(AAN)—Cu entrada di fin di siman, uno di e preparacionnan di mas intenso pa un caso den Corte di Husticia na Aruba, mester conoce su final.
Dialuna 5 di September 2022, Huez lo dicidi si tur cos ta cla pa cuminsa cu e huicio historico di Husticia contra Benny Sevinger, acusado mayor, y un cantidad di acusado den diferente caso cu ta uni den loke ta conoci como Caso Avestruz.
E pregunta cu mester haya contesta durante e proximo lunanan ta, si un haraña golos pa placa a move ocho aña di gobernacion di e Gobierno di Aruba, dirigi pa Prome Ministro Mike Eman, riba terenonan di Aruba.
Te awe e dirigente di Gobierno di Aruba durante e tempo cu e supuesto actonan criminal a tuma lugar, Mike Eman, oficialmente no a wordo scucha dor di autoridad ni ta testigo den loke husticia mes a cualifica como un “neishi di haraña”.
E haraña segun acusacionnan di Ministerio Publico despues di un investigacion intensivo, lo ta ex Ministro di Gabinete Mike Eman, Benny Sevinger, kende awe ta Miembro di Parlamento di Aruba riba insistencia y trabou duro di Mike Eman como su lider di partido y defensor.
Hopi di e caranan cu a bini dilanti durante e proceso di detencion preventivo di acusadonan, ta pertenece directamente na e grupo mas prominente di partido AVP dirigi pa Mike Eman.
E tratamento di e caso penal den Corte di Husticia, tin atencion di cantidad di pais cu lo sigui henter e desaroyo, manera informantenan a splica DIARIO.
Den Reino y na nivel internacional, e acusacionnan serio di Ministerio Publico despues di un investigacion sumamente profundo di Recherche specialisa den nan trabou, tin tur atencion pa loke lo bini dilanti durante e caso.
Esaki na prome lugar debi na e hecho cu entre e acusadonan tin persona cu ya den e caso contra otro ex Ministro di AVP, Paul Croes, mester a atende cu Husticia y awor ta aparece atrobe dilanti Mesa Berde.
Na segundo lugar, den e acusadonan tin personanan di relacionnan internacional. Tambe ta asina cu e caso pues no a keda limita na e frontera di Aruba.
Informantenan ta mustra cu ta bira sumamente intesante pa tuma nota di acusacionnan directo di un suma hopi halto, cu ta relaciona cu acusacionnan di placa mara na delito cu den e caso aki lo a circula na Curacao.
Con lo atende cu acusacionnan den e caso aki dilanti Mesa Berde tin atencion di e circulonan mas halto internacional.
Interesante segun informantenan ta, cu segun e acusacionnan oficial, durante ocho aña, e haraña (manera pa autoridad ta considera Benny Sevinger) por a kibra ley y asina percura pa entrada personal cu terenonan di e pais.
Hustamente esaki ta haci e caso popular den exterior ya cu pa tereno wordo otorga, no ta e Ministro en cuestion so ta dicidi pero e mester di yudansa di mas hende.
Con halto e grado di bofon cu a wordo haci contra Ley na Aruba ta y con esaki por ta posibel na un estado democratico?
E pregunta cu mester yuda otro paisnan evita casonan bochornoso manera segun e acusacionnan oficial di Ministerio Publico contra Benny Sevinger como gobernante e tempo, mester haya contesta den loke ta bini dilanti durante e tratamento di e caso Avestruz entrante otro siman.
“E credibilidad di Aruba y funcionamento di democracia na e Estado di Derecho ta na wega,” ta e punto central.
Otro siman Aruba tin atencion di Reino y atencion internacional. E nomber di Aruba lo resona den un caso, cu un ex Gobernante y cantidad di prominentenan di e pais como acusado.
Sumanan enorme ta wordo menciona den supuesto accionnan ilegal durante ocho aña, cu ta dos temporada di Gobernacion di e Gobierno di Mike Eman, e politico cu a impone presencia di Benny Sevinger den Parlamento y a haci cu pa prome bez den historia di Aruba un detenido a wordo eligi como Miembro di Parlamento di e pais.
DIARIO lo informa Aruba di desaroyonan den un caso cu ta mishi cu e nomber y reputacion di un pais, un Pueblo, conoci pa su nivel halto di moral y respet pa ley.
