Diferente na e gobierno di Eman:
ORANJESTAD (AAN): Durante e tratamento di Presupuesto Supletorio den Parlamento Dialuna ultimo, Prome Minister Evelyn Wever-Croes a expresa cu e ta hopi orguyoso di tur colega minister. Sigur specialmente di Minister di Finansa Xiomara Maduro pa e disciplina cu e tin den su trabou. Esaki no solamente ta wordo demostra den e sala di Parlamento pero tambe den Conseho di Minister. “Esaki ta un disciplina cu no ta facil pa cumpli cu ne pero tur minister di mi Gabinete ta cumpli cu ne cu e compromiso cu un solo meta, cu ta pa mehora e situacion financiero di pais Aruba”, Prome Minister a enfatisa.
Ya caba na aña 2017, Gabinete Wever-Croes 1 a cuminsa cu e vision y disciplina aki. Esaki a logra tambe cu un surplus chikito na aña 2019. Pero, manera tur hende sa, na aña 2020, e pandemia a dal nos abou. Sinembargo, cu e mesun disciplina y determinacion aki, Gobierno di Aruba a sigui traha mesora pa awor Aruba ta den pleno recuperacion, no ainda unda nos mester ta, pero si nos ta riba e bon caminda.
Prome Minister a sigui expresa cu e ta mas orguyoso ainda pa e hecho cu e Presupuesto supletorio 2023 ta wordo trata di tempran. Den pasado, y sigur algun Parlamentario di e partidonan cu ta forma Gobierno actual y algun di partidonan di oposicion actual, tawata miembronan di Parlamento durante añanan 2009 pa 2017, 8 aña largo, na unda cu Parlamentarionan no tawata envolvi den desicionnan di Gobierno.
Durante e añanan aki tambe, Parlamento tabata ricibi e presupuestonan supletorio. Pasobra si un minister no haya un presupuesto supletorio pa cambia su presupuesto, e por wordo teni responsabel personalmente. Pero tin diferencianan grandi entre e gobierno di Eman y e Gobierno di Prome Minister Evelyn Wever-Croes. Prome Minister a menciona tres di nan.
Presupuestonan supletorio di e gobierno di Eman semper tawata wordo entrega laat y no tabata envolve Parlamento:
Presupuestonan Supletorio di e añanan anterior di e gobierno di otro asignatura, semper tabata wordo entrega laat na Parlamento y tabata wordo trata durante fin di aña y casi tabata habri aña den Parlamento. “Ora cu e presupuesto supletorio wordo entrega laat, ya caba e gastonan a wordo haci y e gobierno di e tempo ey tabata bay Parlamento solamente pa cover nan mes y no pa busca aprobacion ni pa informa ni pa envolve Parlamento”, Prome Minister a expresa.
Presupuestonan supletorio di e gobierno di Eman ta wordo entrega cu deficitnan adicional:
Mas tristo ainda, Prome Minister a enfatisa, ta cu no solamente e presupuesto supletorio tabata wordo entrega laat na Parlamento, pero e ta wordo entrega cu deficitnan adicional, yegando te na 50 miyon florin extra y e tempo ey, parlamentarionan di e gabinete di Mike Eman a aproba tur. “Esaki tabata e practica di e gobierno di Eman e tempo ey hunto cu su parlamentarionan”, Prome Minister a remarca.
E Gobierno di Gabinete Wever-Croes, despues di hopi aña, a entrega surplus den presupuestonan y awo ta entrega esaki bugdet neutral, dus lo no haci e surplus menos. Esaki ta danki na e trabounan di Minister di Finansa y su ekipo financiero profesional cu tin e vision y determinacion pa hiba Aruba den progreso.
Presupuestonan supletorio di e gobierno di Eman no tawata tin conseho positivo di Raad van Advies:
E di tres motibo pa compara Gabinete Wever-Croes y Gabinete Eman ta e consehonan di Raad van Advies di e tempo ey cu tawata devastador pa e gobierno anterior y asina mes e parlamentarionan cu tawata sostene e gobierno di Mike Eman, tawata aproba e presupuesto sin lesa, studia y mas ainda, sin worry. Esaki tawata e practica cu a hinca Aruba den un problema financiero hopi serio pasobra e mayoria den Parlamento, esnan cu tawawta sostene e gobierno di Mike Eman, a permiti nan gobierno abusa di nos pueblo.
Si e tempo ey, nos tawata tin parlamentarionan serio, ora e pandemia a dal nos pais na aña 2020, nos lo tawata miho para y lo e no tawata asina devastador pa nos. No solamente e gobierno di Eman a hinca nos den problema financiero pero a causa un desconfiansa di Hulanda pa Aruba. Aruba bou di e asignatura berde, a conoce mal maneho na unda cu a crea deficitnan sin preocupacion algun pa nos pueblo, y no a haci caso di e consehonan di Raad van Advies.
Awo, na mita di aña 2023, Aruba no tin un deficit y tur conseho ta positivo. Esaki sigur ta un diferencia grandi di e tempo di gobernacion di Mike Eman y cu esun di Prome Minister Evelyn Wever-Croes.
“Aruba ta den recuperacion. Nos economia ta crece. Nos turismo ta crece. Desempleo a baha. Inflacion ta bahando. Esaki si di berdad ta progreso y bienestar pa nos pueblo. Ainda nos no ta unda nos mester ta, pero nos ta riba e bon caminda”, Prome Minister Evelyn Wever-Croes a enfatisa.
