Directora di DIMP, Luenne Gomes-Pieters:
ORANJESTAD (AAN) — Luenne Gomes-Pieters, directora di Departamento di Impuesto (DIMP), den un entrevista cu DIARIO a menciona cu DIMP a pasa e lunanan tras di lomba cu un trabao masha intensivo, manera e reformanan fiscal cu a drenta na vigor na Januari 1, di e aña en curso, y na Augustus ultimo, e ahuste den e sistema di cobranza, door di BBO na frontera.
Pa loke ta trata plach'i number DIMP a mira cu e delaster fecha pa paga impuesto di vehiculo di motor tabata 30 di Juni, y e cifranan tocante comportacion di pago a keda igual cu añanan anterior. “Nos ta cera e aña ora nos ta wak con e comportacion di pago tabata y nos ta mira cu e compliance riba tereno di vehiculo di motor semper ta rond di 80%.
“Kiermen, nos tin 20% di contribuyente cu, sistematicamente, tur aña ta keda sin paga of ta paga mitad di aña so, y den e caso aki, 2023 no ta un excepcion. Ta di lamenta si, cu nos ta wak cu ta mesun tipo di categoria di plachinan no ta wordo paga, y esey touch ta un señal cu Departamento di Impuesto kier duna”, Gomes-Pieters a bisa.
DIMP ta wak cu tur aña e cantidad di plachinan cu ta den circulacion ta crece. Aña pasa nan tabata cerca di 88.000 plachi en total y e aña aki nan ta na 89.412 plachi. Esaki combina, kiermen plachi Ai, plachi V, esnan di motocicleta, bus di turismo, etc.
“Nos tin 69.204 contribuyente of plachi cu a wordo paga completamente, y esey ta 77.4% en total y nos tin 2.300 plachi cu a wordo entrega bek na Departamento impuesto, y esey tambe ta conta como cumplimento, den sentido cu nan a entrega nan na tempo. Pues nos ta yega na 77.4% cu 2.6%, pues na 80%, nos por bisa, di cumplimento”, Gomes-Pieters a agrega.
Esnan cu no a paga of a paga mitad di aña, nos ta yega na 7.281 plachi cu a wordo paga mitad aña so, esey ta 8.1% y nos ta wak cu e categoria mas grandi ta e A-plachinan y esey ta di spera.
“Pero loke ta capta nos atencion ta cu nos tin un grupo grandi di V-cars of car rentals cu no a paga nan impuesto di vehiculo di motor completo, y esey ta yega na un total di 405 plachi” director di DIMP a señala.
El a agrega cu esnan cu no tin pago registra at all, pa 2023, ta 10.626 plachi, cu ta yega na un porcentahe di 11.9%. 11.9% cu 8.1% cu a paga mitad aña so, cu ta den default ta yega na 20% di no cumplimento, y e categoria mas grandi ta A.
