Parlamentario Endy Croes:
Mike de Meza no a pasa screening paso segun caya ta papia e debe hopi belasting
ORANJESTAD (AAN): Parlamentario Endy Croes ta splica cu e Gabinete Eman-Croes, esta e Gabinete cu a caba di huramenta diabierna ultimo a cuminsa riba mal pia. Alrededor di 112 dia despues di eleccion y despues di hopi bay y bin nan a logra forma un gobierno manka. Manka paso nan no a logra pa tur ministernan cu nan a propone a pasa screening y Mike de Meza asina a cay pafo di e barco.
Durante 112 dia di formacion ta hopi pleito tabatin
Durante 112 di formacion tabata tin hopi pleito publicamente. Tambe nos por a sigui e panorama momento Gerlien para Mike Eman na varios ocasion y pone Mike Eman y AVP dobla formalmente. AVP mesora ta core acudi na e dos “carpatanan” di AVP, Speed cu Patrick, pa asina lastra Gerlien pa pone presion y ta hasi un encuesta publico riba nan media pa AVP sa con nan ta para. Asina por corda con nan a pleita pa Staatssecretaris unda Mike ta bisa cu e lo aloca 7 Staatsecretaris (pa cumpli cu su promesa na candidatonan) mientras Gerlien ta sali bisa mesun dia cu no ta bin cu Staatssecretaris. Mas tristo ta cu Staatssecretaris NO ta regla den Constitucion di Aruba mes pues ambos a faya barbaramente.
AVP a propone Desiree Croes pa bay Hulanda, Gerlien di NO!
Nos por corda con AVP a propone pa Desiree Croes kende ta un hurista pa bay Hulanda como e Minister Plenipotenciario (Gevolmachtigde Minister)’. Gerlien Croes mesora a bisa ‘over my dead body’. Esaki a pone presion riba Mike Eman unda Mike mester a dobla un biaha mas pa Gerlien. Mike Eman a bay den cashi y saca un pensionado mal kima, stofi’e un poco pa asina finalmente Gerlien aproba Baba (chikitin bin bin) Herde como esun cu lo bay Hulanda. Miembronan di famia di Desiree Croes a rabia masha hopi y por lesa historia di e pasado scur di Gerlien riba facebook cual e rumannan di Desiree a publica.
Riba pagina di Facebook di Yolanda, ruman di Desiree, por a lesa por ehempel ”Desiree nunka a wordo gara cu droga na merca, ni a wordo prohibi pa drenta merca pa 10 aña, nunka never nunka”. Pues un tiramento di palabra pa otro sin fin. Kico nan sa cu nos no sa no ta conoci pero lo bay averigua un ke otro. Corda nan tabata amigo fiel di otro den partido AVP y conoce otro hopi bon. Pues Si cabaron bisabo cu lodo ta hole stinki, kere!
Mike de Meza no a sostene Gerlien pa bira Presidente di Parlamento
Dia 8 di januari 2025 tabata tin votacion pa Presidente di Parlamento unda 20 Parlamentario a vota dunando Gerlien e confiansa pa e posicion aki. E votacion a sali 20-0 y pues (1) Parlamentario a vota blanco. Frapante tabata ta cu Mike de Meza sinta den sala tabata e unico Parlamentario cu NO a sostene Gerlien e momento ey mandando asina un señal kla pa Gerlien y Futuro. Tur esaki ta debi na e pleitonan formal interno den AVP entre Gerlien y Mike de Meza cual a conduci tambe cu Gerlien a bandona e fila di AVP. Gerlien no a pordona Mike de Meza y nos a compronde cu Gerlien ta esun como Formador a para fuerte cu Mike de Meza no ta bira Minister ni cu areglo di pago di belasting. Berdad si ta cu Mike de Meza ta un berguensa pa comunidad como un ex-minister di finansas di AVP (2009-2013).
Segun wandelgangen De Meza tin debenan astronomico di belasting. Segun informacion te hasta si e logra haci un bon areglo cu belasting, pagando un suma substancial inicialmente, su chens ta keda hopi chikito pa formador aproba su candidatura awor cu su violacion di ley y incumplimento ta conoci. Mike de Meza aparentemente a bula bay Corsou pa presta placa na banconan na Corsou como cu na Aruba el a wordo nenga. Formador e tempo ey Gerlien a para duro cu e no ta acepta Mike de Meza den e situacion aki ni cu areglo di pago sino no tin gobierno. Sino fono. Ata Mike Eman a dobla un biaha mas. Mesora e “cachonan” di Mike Eman y AVP esta Speed cu Patrick (Lassie cu Lady), gritando na radio atrobe insultando Gerlien pa spanta hende y pa pone presion. Hecho ta cu Mike de Meza na final a keda den Parlamento cerca su brother bieu Marlon Sneek, mientras Gobierno nobo a wordo huramenta cu 6 minister enbes di 7. Segun Parlamentario Endy Croes lo keda vigila di cerca pa keda informa pueblo.
