Fiscal Zamira Paesch:
ORANJESTAD (AAN) Fiscal Zamira Paesch, di Ministerio Publico, a sigui elabora riba e cambio den e sistema di boet na Aruba, cu ta vigente for di 2023, y e ta menciona e sumanan cu mester paga na boet segun e infraccion cu e persona a comete.
El a menciona cu dia 3 di April 2025 awo, tin casonan di trafico na Corte (un biaha pa luna tin casonan di trafico), y esaki kiermen cu te dia 2 di April por bay paga e transactie bedrag, cu eigenlijk ta un suma un poco mas abao.
“Na momento cu e caso yega Corte, bo lo mester paga e eisbedrag, y esey ta unda bo multa ta subi. T’a aconsehable pa bay Corte si bo n' ta di acuerdo cu e multa. Si bo ta pensa cu polis a duna bo un multa cu no ta clop; bo no tabata tin telefon na bo man, bo tabata tin e safety belt bisti, anto e multa aki no ta cuadra; ta bo derecho pa bay Corte, anto e ora ey convence Huez cu e multa aki no ta cuadra”, Fiscal Paesch a señala.
El a agrega cu si bay Huez y e ta haya cu e multa ey ta clop, e persona ta haya un sentencia unda cu e multa ta subi y e parti di ehecucion di Ministerio Publico ta cuminza, anto pa e ora ey cu bo haya un sentencia, Ministerio Publico ta manda bo carta.
“Bien ta cu antes bo tabata haya e carta prome cu bo caso tabata bay Corte, esey no ta existi mas. Awo bo ta haya bo carta ora cu bo tin un sentencia caba y cu bo multa a subi caba. Dus, na momento cu polis duna bo un boet, nan mester duna bo e papel, anto riba dje ta para tambe cuanto cu paga y te ki dia bo tin pa paga”.
El a splica cu despues cu e persona tin sentencia e parti di ehecucion ta cuminza unda e ta haya un “kennis hebben”, un carta cu e persona a wordo sentencia pa paga tanto suma na boet. E ta haya un fecha atrobe pa bin paga, y si no cumpli e ta haya un amonestacion cu e boet ta subi atrobe cu 25 florin, despues e ta haya otro amonestacion cu e boet ta subi cu 25%.
“Pa tuma un ehemplo, si bo no tin bo safety belt bisti bo ta haya un boet di 200 florin, si no a presenta na Corte e multa a subi pa 300 florin, eerste aanmaning ta subi te 325 y tweede aanmaning si no bin paga e boet ta bira hopi mas significante”, segun Fiscal Paesch a señala. Pesey e ta aconseha pa ora un persona haya un boet pa bay paga na OM mas pronto posible.
