Prome Ministro Wever-Croes ta actua corecto contra exigencia Hulandes - Debe hereda di 653 Miyon pa Hospital nobo ya tabata peso pa Salud Publico - Covid-19 ta exigi maneho continuamente ahusta na demanda cu ta presenta
ORANJESTAD(AAN)- “Cuido Medico ta central den e caida di tur normalidad na mundo. Aruba prome cu e Coronavirus nobo a bati a porta, ya tabata enfrenta un realidad serio den uno di e alanan mas importante di Salud Publico, cu ta e cuido intramural.”
Informacion cu ta bini dilanti di expertonan, cu DIARIO a consulta despues di un decision clave di Prome Ministro Evelyn Wever-Croes pa loke ta trata e exigencia Hulandes pa Aruba baha su gastonan di cuido medico cu 60 Miyon.
E exigencia aki ta mara na e acuerdo financiero cu Aruba a alcansa cu Hulanda na 2020, pa asina Aruba por a haya un prestamo sin interes di Hulanda pa cubri tanto e resultadonan di e crisis financiero cu a exigi supervision Hulandes na 2015 como e resultadonan di e pandemia Covid-19 cu a basha economia y situacion financiero di Aruba abou.
Prome Ministro Wever-Croes a mustra Hulanda cu Aruba no por baha su gastonan cu mas cu 40 Miyon y ta tene duro na e posicion aki.
E resultado por ta, cu Hulanda cu ta admiti cu Aruba tabata e prome pais den Reino cu a tuma medidanan pa coregi su maneho financiero bou mando di Prome Ministro Wever-Croes, cu Hulanda ta nenga di paga e proximo parti di su asistencia financiero na Aruba.
Segun expertonan financiero y di Salud Publico cu Aruba a consulta na Aruba y na otro paisnan di Reino y pafor di Reino, Prome Ministro Wever-Croes ta actua na forma responsabel ora e bisa cu no por baha e gastonan di Gobierno cu mas cu 40 Miyon.
A wordo indica na DIARIO cu mester tene cuenta cu e aumento di gastonan total di sector di Salud Publico na Aruba, cu Ministro di Salud Publico, Dangui Oduber, a sabi di maneha na un forma corecto.
Ora papia di gastonan di Salud Publico, mester mira con esaki ta wordo cubri na Aruba cu conoce un Seguro Medico General, cu a wordo introduci cu problema.
AZV a mira luz na Aruba den un empuhe politico y despues cu AZV a haci su entrada, mester a atende un cantidad di asunto cu no tabata bon regla.
AZV a bira un exigencia legal pa e ciudadanonan cu mester paga prima pero tambe pa Gobierno di Aruba.
Di su banda, AZV a bira e centro financiero di cuido medico na Aruba ya cu ta pa medio di AZV tur ciudadano di Aruba ta haya nan cuido medico segun ley.
AZV ta ricibi pago di Pueblo pero tambe mester paga pa e cuido cu ta depende di e gastonan cu e personanan y entidadnan tin.
Asistencia di Gobierno ta rekeri pa evita henter e sistema di cuido medico basha abou financieramente.
Pero ta hustamente irresponsabilidad financiero di parti di Gobierno a pone un peso na sigur Hospital, cu a keda cu un resultado financiero di 653 Miyon como parti di e proyectonan Bo Aruba.
Mientrastanto mester a sigui inverti den un tempo di progreso cientifico y sigur ora Covid-19 a bati na porta despues cu mester a hica mas placa den e Hospital nobo, cu tabata hole Diesel, tabata yena cu awa na momento di yobida y hasta a mira pashentnan na careda ora asbest tabata kima riba dak.
Covid-19 a exigi adaptacion pisa y a bira gastonan enorme pa e sector di Cuido Medico. Ekipo nobo, medidanan special cu mester tuma pa por trata pashentnan, un cuido sumamente intensivo cu pashentnan hasta interna na Colombia, a aumenta gastonan medico di Aruba.
Gastonan medico lo sigui subi, segun informantenen y e Gobierno nobo, sigur Prome Ministro Wever-Croes y Ministro di Salud Publico Dangui Oduber, mester tene na consideracion cu e necesidad total di exigencia aumenta di Cuido Medico ainda no ta conoci.
Expertonan ta considera cu na e momentonan aki hasta ta dificil papia di baha gastonan den Cuido Medico, cu ta centro di e pandemia Covid-19, cu sigur lo tin resultado riba termino mas largo pa Salud Publico di Aruba.
Mester pensa tambe riba necesidadnan cu ta bay surgi pa paga riba e demanda mas grandi pa personal, pa ekipo, pa medidanan nobo cu mester tuma y hasta pa un crecemento di cantidad di pashent cu indirectamente a bira victima di Covid-19.
Aki mester tene cuenta cu e pashentnan cu tin condicionnan medico cu pa mortibo di Covid-19 nan no a atende.
Segun informantenan Hulanda mester tin oido pa e situacion cu Aruba ta presenta den un panorama cu ningun hende a spera y pa cual ningun pais no tabata prepara.
Aruba mester para fuerte riba e punto aki segun tur experto, cu ta indica cu ainda ni Gobierno di Aruba ni Gobierno di Reino por duna e resultado final di exigencianan di Covid-19 cu tin paisnan grandi na careda y sin fecha ki dia e careda lo por finalisa.
