Un pueblo cu un democracia herida ta observa entrada di e partido - Un voto di confiansa pa e politiconan nobo den gobernacion di Aruba - DIARIO a considera Raiz e partido eligi pa comparti gobernacion
ORANJESTAD(AAN)- Eleccion 2021 a bira un evento di mayor importancia pa Aruba, cu no solamente ta sufri di e asalto di e pandemia Covid-19.
Aruba a bay eleccion 2021, como un pais cu un democracia herida door di politiconan den cual Aruba a yega di pone su confiansa y na kende Aruba a entrega su futuro sin pensa kico politiconan ta capaz di haci cu nan pais.
E temporada 2017 pa 2021, cu ironicamente mester a hiba Aruba na celebracion di 35 aña Status Aparte, autonomia, pa cual tanto Aruba a lucha, a entrega na Aruba pruebanan di e forma cu politiconan por abusa di confiansa di un Pueblo, cu a keda atras na 2017 cu un debe nacional, debenan PPS y holor di corupcion cu gobernantenan den prison.
E base di democracia a wordo destrui. Pa democracia por existi, e mester di gobernacion cu ta traha pa Pueblo na nomber di Pueblo y no gobernantenan den prison y gobernantenan suspendi di castigo di prison den su Parlamento.
DIARIO for di 2017 a observa e trabounan di Gabinete Evelyn Wever-Croes, cu a cambia e rumbo desastroso di Aruba bou gobernacion di Mike Eman cu a pone Aruba bou bota di supervision Hulandes.
Den bista di mundo Aruba a perde su cara pa e aventura di Citgo, cu DIARIO mester a desenmascara como fantasia cu sinembargo a stroba Aruba di traha riba un economia sano pa futuro.
E espectaculo teatral di Marisol cu a sconde otro episodio di e Cas di Madushi, den Parlamento cu a wordo abusa dor di Marisol na 2020 a bay topa cu un Vice Presidente di Parlamento, Alan Howell, cu ta wordo acusa dor di Husticia pa placa di fondo di Parlamento.
Den e realidad aki, DIARIO a contempla e resultadonan di eleccion di Aruba, cu a entrega MEP 9 asiento y a habri caminda pa Evelyn Wever-Croes, e votegetter mas grandi di e pais, forma un Gobierno.
Cu Raiz tabata e unico partido cu DIARIO sin mas a mira como unico partner di un Gobierno di coalicion cu por a gosa di nos respet, tabata algo cu DIARIO a trece dilanti directamente despues di eleccion.
Teniendo cuenta cu loke DIARIO mes a trece dilanti na su lectornan, nos a mira den Raiz e partido cu por a uni cu MEP, pa entrega Aruba un Gobierno cu ta coresponde cu e base di democracia.
Un Gobierno democratico no ta solamente un Gobierno cu a wordo eligi durante un eleccion.
Gobernantenan democratico mester pone e bienestar di e pais dilanti tur cos y hamas por ta parti di loke nos a trece dilanti como acusacion proba contra AVP di Mike Eman y e partido di Marisol y su grupo. Nos no ta menciona Accion 21 ya cu claramente Accion 21 mester di un milager cu por scapa Miguel Jose di su posicion unico den Parlamento.
E forma cu integrantenan di Raiz a presenta nan mes, sin show y sin fantasia, a crea cerca nos e confiansa cu Raiz como participante den coalicion, lo sigura bienestar di Aruba.
Un grupo nobo, un grupo hoben uni den Raiz, ta presenta su mes pa sirbi Aruba cu mester duna contenido nobo na su autonomia, na su Status Aparte, den cual dignidad y integridad ta central.
Awe nos ta entrega un voto di confiansa na Raiz, cu nos ta spera lo tira raiz den e suelo politico di Aruba como parti di Gabinete Evelyn Wever-Croes, na un momento historico pa Aruba y henter mundo.
