SANTA MARTA: Su nomber ta Bernio Jordan Enzo-Verhagen, y el a resulta di ta un simple futbolista falso procedente di Europa.
Pero e tabata gusta bin pasa vakantie yena di luho na Cartagena, via di estafanan miyonario, y tabata haci mesun cos na Santa Marta, pero el a wordo descubri pa un trahador sexual, cu cual el a pasa loke tabata su ultimo anochi na e ciudad ey.
Tabata Diabierna cu Bernio Enzo-Verhagen a yega na Santa Marta y for di e dia ey el a biba un bida a-la-grandi, hunto cu otro amigonan cu cual el a bin pasa su viahenan na Colombia.
Autoridadnan na Santa Marta a detaya, cu e ciudadano aki di nacionalidad Hulandes a presenta su mes tur caminda como hungador profesional di clubnan grandi na Europa, y a hasta mustra hende potretnan den cual bo ta mire ta parce di ta firma contract banda di dirigentenan di club, y tambe algun colega hungador, cu uniform di team.
Su accento y forma excentrico di bisti, a hala atencion na e lugarnan cu e tabata bishita. Varios persona cu a cay pa su trampa, tabata yega cerca dje y ta pidi su firma y tambe un potret cune pa recuerdo.
Comandante di Polis Metropolitano di Santa Marta, esta coronel Oscar Solarte, a bisa cu Bernio Enzo-Verhagen a pasa anochi den suites di Hotelnan di Santa Marta, el a huur yatenan, y a disfuta di gastronomia local sin paga ni un Peso.
“Na Santa Marta, esnan cu ta duna servicio turistico a caracteriza nan mes door di brinda un atencion hopi special na stranheronan, y den e caso aki aun mas, ora cu a haya sa cu nan dilanti tin un top super-estreya di Futbol internacional,” segun e coronel a bisa.
E metodo di estafa cu e tabata usa, segun coronel Solarte, ta cu e ta haci reservacion via di Apps y e tabata bay di acuerdo pa haci e pagonan di forma virtual, bao di e pretexto cu e no ta cana cu placa cash Colombiano.
“E tabata bin mustra Frontdesk algun prueba electronico di transaccion, pero e tabata keda semper pendiente y ta splica cu e placa a wordo paga den weekend, y pesey ta te Diamars e transferencia lo keda cla como cu e ta un giro internacional,” e oficial a bisa.
Prome cu e transferencia a concretiza, e futbolista falso ya tabata cancela su estadia, pero pa e ora ey ya caba el a disfruta di e servicio y producto cu el a ricibi.
E ciudadano Hulandes di 27 aña di edad, a pasa un weekend yena cu exceso y descontrol na Santa Marta, y sinembargo prome cu el a bandona e ciudad, el a haci un escandalo cu un muher di bida, cu el a contrata, y e muher aki ta esun cu a bay divulga su berdad na Polis Colombiano y na su victimanan.
E muhernan di bida aki si, contrario na e otro personanan cu el a logra gaña, tabata exigi pago cash, y ora cu nan no a ricibi placa nan a cuminza insulte y pidi asistencia di Polis pa pone e futbolista falso aki paga nan.
Polis a yega net na tempo, pasobra e momento ey ya caba varios persona tabata rabia cu Bernio Enzo-Verhagen te cu nan tabata kier a mate y hork’e den e area turistico di El Rodadero.
Ora cu Polis a verifica su antecedentenan, a bin conclui cu ta trata aki di un estafador internacional kende tin costumber di viaha rond mundo ta estafa Hotel, Restaurant, Agencianan di Viahe, y Teamnan di Futbol.
Comandante di Polis Metropolitano a haci un yamado na tur esnan cu a wordo estafa pa e homber aki, pa nan haci un denuncia na Ministerio Publico. A hasta check cu Interpol, y a haya sa cu na Dinamarca el a wordo condena pa estafa, y tambe ta envolvi den un asunto di secuestro di un muher na Chile, pero toch no tabatin ningun orden di captura contra dje.
Bernio Enzo-Verhagen ta naci na Paramaribo (Suriname) y di tempo cu e tin 25 aña el a cuminza estafa hende ora el a wordo contrata pa e team di FC Dinamo-Auto. Despues el a uni cu e club Cape Town City FC, pero nunca el a debuta den e team y el a bandona e ciudad den menos di un luna.
Un luna despues el a yega na Audax Italiano na Chile, y eynan el a bay biba na un cas grandi na Puente Alto y tabata gana un salario halto cu ta mucho mas cu e otro hungadornan. No a dura hopi cu el a bandona e lugar y acusa e club di racismo.
El a bay Europa unda cu e mesun strategia el a hala atencion di Viborg FF cu tabata kier a firma contracto cune, pero nan a logra haya sa cu su documentonan di hungador ta falso y e no ta pertenece na ningun agencia di futbolista manera e tabata blof tur caminda. E oficina huridico di e club a denuncia e futbolista, kende a wordo capura pa Polis Danes y acusa di estafa.
