Tema 2021: - ORANJESTAD (AAN) – Un bunita tema a wordo scogi pa e Organizacion di Nacionnan Uni (ONU) pa celebra e di 20 aniversario di e Dia Mundial di e Personanan Refugia: “Hunto nos ta cuida otro, nos ta siña y nos ta briya”.
Desde aña 2001, e dia Mundial di Personanan Refugia a wordo celebra dia 20 di Juni di cada aña, cu e obhetivo di visualiza y yuda miyones di persona cu ta biba den condicion di refugia, desplaza, y na spera di asilo politico den diferente pais debi na conflictonan arma, violencia, persecusion di cual nan ta victima den nan mes pais di origen.
E observacion di e dia aki, a cuminza na aña 2001, den conmemoracion di e di 50 aniversario di e Convencion tocante e Statuto di e Refugiadonan di 1951.
Prome cu e designacion oficial aki door di e Asamblea General di Nacionnan Uni, e Dia Mundial aki tabata wordo conoci como “Dia di e Refugiadonan di Africa”.
Kico ta nifica, ta un refugiado? Un refugiado ta un persona cu ta wordo obliga pa laga su pais atras, debi na problemanan interno manera conflicto arma, persecusion, por ehemplo politico, y tur tipo di violencia.
Hopi biaha un refugiado ta re-cuminza su bida den lugarnan leu for di e pais cu a mire nace, y leu di su famia.
E motibonan di mas comun di persecusion, cu ta genera hopi refugiado, ta door di conflictonan politico, y temanan social, racial, religioso, y incluso sexual, cu si e persona no duna e stap decisivo di busca refugio den otro pais, ta pone su bida na peligro.
E no ta un salida facil, pasobra hopi biaha e personanan refugia y desplaza ta enfrenta problemanan social, cu ta rekeri di e desaroyo di politicanan sanitario, educativo y social di parti di e paisnan cu ta ricibi nan.
Por ehemplo: dificultad pa haya atencion medico basico y specializa, exclusion di e mercado laboral tanten no tin permiso di estadia y trabao, xenofobia y racismo, no tin acceso na e sistema educativo en caso cu ta e famia henter mester imigra, depresion, problemanan emocional, entre otro, y tambe door di no conta cu un seguro di salud por confronta cu problema di salud reproductivo y morto neonatal, pa menciona algun situacion di salud. No mester lubida con duro e golpi di covid-19 tabata pa e personanan refugia y imigrantenan en general, rond mundo, y sin laga Aruba afo.
ARUBA:
Tin indicacion cu na Aruba tin mas di 1500 refugiado cu tin peticion pa asilo, y aparentemente tin algun cu a haya esaki, pero no un grupo grandi. Y tur e problemanan cu a wordo menciona prome, den e articulo aki, nan tambe a pasa of ta pasando aden. Aparentemente, tin personanan di e grupo aki cu a bira malo y mester a haya cuido na hospital, cu tin debe di miles di florin y nan tin cu haci trabaonan pisa, cu e temor di wordo descubri, pa baha poco, poco e debe aki. Esaki ta informacion confidencial cu DIARIO a ricibi, precisamente en ocasion di Dia di Refugiadonan.
