Futbol femenino na Aruba ta conoce un empuhe strategico cu e apoyo di FIFA

Parlamentario Eduard Pieters (PPA):

ORANJESTAD (AAN): Parlamentario Eduard Pieters a bishita Arubaanse Voetbal Bond (AVB) pa conoce di cerca e Women’s Development Program, un plan strategico enfoca riba desaroyo di futbol femenino na Aruba. Pa Pieters, e encuentro no tabata solamente un presentacion deportivo, tabata un reflexion riba liderazgo, igualdad di oportunidad y inversion den futuro di nos hubentud.

   Futbol femenino no ta un tema secundario. Ta un motor di desaroyo social y personal, cu ta forma caracter, disciplina y liderazgo den generacion nobo di e deportistanan.

  Un plan strategico cu vision: Durante e presentacion, AVB a comparti su programa completo basa riba varios pilar strategico, entre nan liderazgo, desaroyo deportivo, participacion y fortalecemento institucional. E meta ta cla: crea un structura sostenibel pa futbol femenino, unda e muchanan y e damanan por desaroya nan talento y nan personalidad como lider den deporte y den comunidad.

Segun Pieters, deporte semper ta un scol di liderazgo. Un deportista ta siña disciplina, traha den ekipo, resiliencia y responsabilidad, pues e habilidadnan cu despues ta refleha den tur otro aspecto di bida. P’esey, e programa aki no ta solamente pa gana partido, pero tambe ta pa forma futuro lider.

   Rol di Parlamento den desaroyo deportivo: Como parlamentario, Pieters a enfatisa cu Parlamento tin un rol importante pa sostene desaroyo deportivo. “No solamente cu palabra, pero cu maneho publico. Parlamento por  haci e preguntanan relevante na minister concerni, promove maneho pa deporte hubenil y incluso presenta e mocionnan pa fortalece financiamento pa desaroyo deportivo”.

   Segun Pieters, inversion den deporte ta inversion den sociedad. Futbol femenino merece e mesun oportunidad y sosten cu cualkier otro disciplina deportivo.

   FIFA como motor di desaroyo: Un elemento crucial tras di e progreso di futbol na Aruba ta e tremendo colaboracion cu FIFA. Organizacion mundial di futbol ta inverti den infrastructura, capacitacion y programa di desaroyo. Pero e colaboracion aki no ta automatico.

   E federacion nacional mester cumpli cu exigencianan di gobernacion, transparencia y planificacion strategico. Segun Pieters, AVB ta demostra cu ora un federacion cumpli cu e standardnan internacional, inversion y confianza ta sigui. 

Hubentud motiva cu bandera di Aruba na pecho

Durante e evento, Pieters tambe a haya oportunidad di combersa cu algun di e hungadornan di seleccion femenino. Loke a impact’e mas tabata e motivacion di e damanan hoben cu ta representando Aruba. “Bo por wak claramente e orguyo cu nan tin pa Aruba,” el a comenta. “Muchanan cu ta pone e bandera na pecho y cu ta soñando grandi.”

E energia aki ta mustra cu futbol femenino no ta solamente creciendo sino ta inspirando.

E presentacion di Women’s Development Program ta mustra cu Aruba tin talento, vision y liderazgo pa sigui eleva futbol femenino. Pero progreso sostenibel ta pidi compromiso continuo di federacion, gobierno y comunidad.

   Finalmente Eduard a expresa: “Fraccion di PPA ta expresa su apoyo pa iniciativa cu ta promove igualdad di oportunidad, liderazgo hubenil y orguyo nacional. Pasobra ora nos inverti den deporte, nos no ta solamente creando campeon, nos ta formando ciudadanonan fuerte pa futuro di Aruba”.