Fundacion Telefon pa Hubentud Aruba ta buscando logo nobo bao hobennan

Tin riba 1.200 mucha participando

ORANJESTAD (AAN): Fundacion Telefon pa Hubentud Aruba desde 1999 pa medio di su servicio ta duna informacion, opcion y sosten emocional na mucha y hoben di Aruba.

   Pa haci esaki Fundacion Telefon pa Hubentud Aruba ta haci uso di diferente instrumento manera: telefon, email, chat, website, charla, workshop y proyecto. Desde maart y juni di e aña aki Fundacion Telefon pa Hubentud Aruba ta dunando informacion, opcion y sosten emocional pa medio di telefon na e muchanan y hobenan di St. Eustatius y Saba tambe.

   Esaki director di e fundacion James Sneek a bisa Diamars mainta durante un conferencia di prensa.

   “Fundacion Telefon pa Hubentud Aruba e aña aki lo cumpli 23 aña dunando servicio na nos muchanan y hobenan di Aruba”.

Pa por prepara Fundacion Telefon pa Hubentud Aruba  pa e proximo 20 aña y tin un organizacion sostenible, actualmente nos ta incorporando diferente instrumento sostenible, según Sneek.

El a sigui bisa cu e logo di Fundacion Telefon pa Hubentud Aruba ta un di e instrumentonan aki.

Según e director, e logo actual a percura pa e organizacion tabata reconocible durante 23 aña caba.      

   “Ta importante pa bo organisacion y e trabao cu bo organisacion ta haci por ser representa pa medio di bo logo”.

   E norma, balor, vision y mision di bo organisacion mester ser refleha den bo logo. Na e manera aki bo lo comunica cu bo grupo di meta mas efectivo, según Sneek.

El a sigui bisa cu Fundacion Telefon pa Hubentud Aruba ta un organisacion cu ta traha pa y cu mucha y hoben. Esey kiermen cu no solamente ta duna informacion, opcion y sosten emocional na mucha y hoben, pero tambe ta scucha di mucha y hoben con nan ta pensa cu e servicio di Fundacion Telefon pa Hubentud Aruba mester ta. Sneek a indica cu despues cu e Jongerenraad di e fundacion a duna conseho riba con pa yega na un logo nobo, e paso a wordo tuma pa bay busca e idea y pensamento for di nos muchanan y hobenan.

   Pa yega na un logo nobo Fundacion Telefon pa Hubentud Aruba ta organizando un competencia di pintura bao di mucha y hoben. For di e pinturanan aki Fundacion Telefon pa Hubentud Aruba lo haya ideanan pa incorpora den e logo nobo. Na e competencia aki ta participando 1208 mucha y hoben di 7 scol basico y 5 scol secundario.

   Di cada scol lo saca un pintura ganador. E mucha/ hoben cu pinta e pintura ganador di su scol lo presenta su creacion na un grupo di hurado. Na final lo saca un pintura ganador di scolnan basico di Aruba y un pintura ganador di scolnan secundario di Aruba. E mucha y hoben cu a crea e pintura ganador lo ricibi un premio cu e por uza pa cu su educacion y den su tempo liber.