ORANJESTAD (AAN): Den cuadro di Codigo di Proteccion, Fundacion Telefon pa Hubentud Aruba a worde acerca pa Unicef Nederland pa organiza diferente focus group cu hobennan.
Unicef Nederland conhuntamente cu Augeo Foundation, Ministerio di Husticia y Asuntonan Social y un grupo di profesional na Aruba ta creando un asina yama ‘Toolkit Digital’ unda tur profesional den e sector social, di educacion, husticia y salud por educa nan mes ariba diferente tema tocante maltrato di mucha.
Esaki trahador social di Telefon pa Hubentud Shurman Milliard a trece dilanti durante un conferencia di prensa Diamars mainta.
El a indica cu ya no por papia mas ariba mucha y hoben, pero mester papia cu e mucha y hoben tocante su seguridad.
“Durante e focus group ta combersa cu hobennan por ehempel tocante educacion na Aruba, maltrato di mucha, impacto di maltrato di mucha pa cu desaroyo y bienestar di mucha y hoben y con e mucha y hoben ta sinti nan mes sigur”.
DIARIO a compronde Un total di 16 hoben ta participando den dos focus group cu lo tuma lugar durante cuatro Diasabra.
Pa percura pa tin un representacion husto y diverso a acerca diferente organizacion den nos comunidad. Aki por pensa ariba organizacionnan di personanan di diferente origen, organizacionnan di iglesia, scolnan, organizacionnan caminda hoben ta participando etc., segun, Milliard.
El a sigui bisa cu e hobennan participando ta entusiasma pa contribui na seguridad di nan mes, seguridad di otro hoben y muchanan na Aruba. Durante e prome sesion e hobennan a siña conoce otro mihor. Durante sesion dos y tres nan lo elabora ariba diferente tema di maltrato di mucha y seguridad di mucha. Na final durante sesion cuatro nan ricibi un presentacion di e producto final.
Milliard a finaliza bisando cu pa mas informacion tocante Focus group, Tools por tuma contacto cu Fundacion Telefon pa Hubentud Aruba www.131.aw
