Fundacion Telefon pa Hubentud Aruba a organisa 'The children no one misses'

ORANJESTAD (AAN):  Tiki tiki mas y mas risico ta presente den nos comunidad y nos comunidad ta birando mas y mas complica.

Esaki ta pone cu tin biaha e por costa un persona hopi mas esfuerzo pa por participa den nos comunidad. Sigur si un persona tin por ehempel un limitacion cognitivo, esaki por stroba e persona su participacion den nos comunidad. Reconoce un limitacion cerca un persona y tene e persona den cuenta, por yuda e persona den su bida y por preveni problema adicional.

            Pa di 24 aña consecutivo Fundacion Telefon pa Hubentud Aruba ta organisa Deskundigheidsbevordering Dag pa asina inverti den e desaroyo di su mentornan. E mentornan ta e personanan cu tur dia di 2:00 te cu 6:00 di atardi ta asisti nos muchanan y hobenan di Aruba, Bonaire, Saba y St. Eustatius cu informacion, sosten emocional y consejo. Deskundigheidsbevordering Dag ta un di e tres trainingnan grandi cu Fundacion Telefon pa Hubentud Aruba ta organisa tur aña. Deskundigheidsbevordering Dag ta ser organisa den cuadro di un di e pilarnan di e beleid di Fundacion Telefon pa Hubentud Aruba cu ta ensera inversion den personal di e organizacion.   

            E Deskundigheidsbevordering Dag a hiba e nomber, The children no one misses y tabata tin como tema Licht Verstandelijke Beperking. Como profesional den mundo social, enseñansa, medico, hudicial y tambe como mentor na Fundacion Telefon pa Hubentud Aruba bo ta bin den contacto cu persona cu por tin un limitacion cognitivo. Importante ta pa sa con pa trata cu un persona cu por tin un limitacion cognitivo. Apariencia no lo mustra bo cu un persona ta LVB’er, locual hopi biaha lo haci nan The children no one misses.

            Durante e Deskundigheidsbevordering Dag e mentornan di Fundacion Telefon pa Hubentud Aruba a ricibi conocemento tocante Licht Verstandelijke Beperking, algun tools pa reconoce esaki y con pa hiba un combersacion cu un mucha/ hoben cu por ta  LVB’er. E conocimento aki a ser transmiti door di Adaline Rasmijn, GZ- Psycholoog.

            Tambe e servicio na e muchanan y hobenan di Bonaire, Saba y St. Eustatius a ser trata durante e Deskundigheidsbevordering Dag. E muchanan y hobennan di Bonaire, Saba y St. Eustatius ta yama e number 918 na nan isla y e mentornan di Fundacion Telefon pa Hubentud Aruba ta duna nan  sosten, ayudo y informacion.

            Den cuadro di esaki e mentornan a ricibi informacion etnico, cultural y di educacion di e muchanan/ hobenan di Boniare, Saba y St. Eustatius.