Dalgis Montalvo di Fundacion HUNTO:
- Mayoria di casonan ta den edad hopi jong
ORANJESTAD (AAN) Den entrevista cu DIARIO, e director di Stichting HUNTO, señora Dalgis Montalvo, a señala cu ta henter un proceso pa cambia e situacion di adictonan ambulante, cu tin na Aruba actualmente.
Internacionalmente, tambe e problema t’ey, y locual HUNTO ta haciendo como Instancia, ta wak con ta build up su sistemanan, structura e procesonan pa nan cana mas lihe.
“Nos tin e diferente centronan, nos tin e parti ambulatorio pa esnan cu nos ta bay purba yuda riba caya, pues nos tin cu structura esakinan como tambe e aspecto intramural, manera Centro Colorado.
“Pues, e ta un proceso pa structura e programanan cu tin, structura e trahadornan, capacita nan pa nan por haci e trabao. E ta un proceso cu e problematica aki bo no ta bay resolve den dos, tres aña.
“E ta un problematica hopi grandi, cu nos ta compronde y mira esey tambe. Pa loke ta e parti social, e ayudo cu nos ta brinda pa e salud mental basico tambe ta mira e cifranan di edad cu ta yegando cerca nos, nan ta den edad jong”, Montalvo a señala.
Pa HUNTO ta importante pa señala e problematica den forma preventivo, cu por yuda e hoben mas lihe posible, top’e riba caya, motiv’e p’e bay Centro Colorado.
El a splica cu ta un proceso pa e hoben yega na adiccion y ta un proceso tambe pa sak’e for di eynan.
“Esaki ta rekeri tambe capacitacion di e personal, kico tur ta e disciplina cu nan mester pa por yega na e personanan aki, con nan ta structura e programanan cu nan tin, pues ta un trabao interno mester tuma lugar, prome cu por cuminza takel e problematica eyfo”, Dalgis Montalvo a señala.
El a subraya cu tanten nan ta bon structura y capacita, nan por brinda un miho servicio, y por bay wak e diferencia riba caya, cu e adictonan ambulante ta bay baha y lo bay yuda esnan cu ta cayendo den e situacion di adiccion na edad hopi trempan.
“Mayoria di e casonan cu ta bin dilanti ta hobennan, cerca nos e grupo mas grandi ta entre 6 pa 20 aña, cual ta edadnan hopi jong. Hasta nos ta purbando traha pro-activo y tambe nos ta bayendo scolnan. Nos tin samenwerking cu EPB pariba, na San Nicolas, unda cu nos trahadornan social ta bay tur siman, dos biaha pa siman, y ta cuminza e trayecto ambulatorio, pa loke ta e parti di adiccion di hobennan na scol”, Dalgis Montalvo a menciona.
El a subraya cu no ta solamente e parti di adiccion, pero con pa haci e hoben mas resiliente, con pa deal cu soledad, cu depresion, con pa deal cu su mes y cu e parti unda e ta bibando aden, cu ta hopi vulnerable.
