Un dia historico pa Aruba:
*Idea a sali for di e propio pashentnan
ORANJESTAD (AAN) – Den entrevista cu DIARIO, Dhr. Jayburtt Dijkhoff, a declara cu awe, Diabierna 28 di Februari, ta un dia historico pa Aruba, pasobra Fundacion Siki tin e grato placer di lanza e prome Plataforma di Pashent na Aruba.
E Plataforma yama “Pashentnan di Aruba”. E ta simpel, obvio y evidente cu e ta pa pashent y e ta sali for di e propio pashent, Jayburtt a duna di conoce. “Idea di esaki ta pasobra Aruba mester di un organizacion cu ta boga y sali na defensa di e derechonan di e pashent”, Jayburtt Dijkhoff a señala.
“Mi sa cu ultimo temponan aki, hopi persona a nota cu ami ta duna charlanan gratis tocante derechonan di pashent, na diferente bario na Aruba, centro y organizacionnan, no solamente na Aruba pero tambe na Curacao, Dus e interes tey, pero falta un siguiente paso. E paso ta cu tin e necesidad pa tin un plataforma, un organizacion, pa bisa kico ta e prioridadnan di e pashentnan riba nos Isla, pero tambe pa por negocia cu gobierno, vooral den foro, p’asina traha riba e puntonan di mas importante cu ta toca cada un di nos cu lo por bira pashent”, Dijkhoff a relata.
“Toch tin varios pais desaroya unda pashentnan ta organiza nan mes, nan ta forma un Asociacion, of un Federacion, hasta den diferente pais grandi, pero na Aruba nos no ta na e nivel ey. Nos Asociacionnan cu tin na Aruba, hopi biaha ta confronta nan mes cu e mesun problema. Hendenan por ta no tin interes, of no hopi tempo pa keda organiza nan mes, no riba nan so pero riba e islanan, anto pa e motibo ey a opta pa lanza un plataforma cu ta mas na drempel, cu tur hende por haya acceso, nos por haya informacionnan mas clave den pueblo, y por a hiba esaki di manera anonimo, safe, sigur pa gobierno por ta conciente tambe kico précis ta biba den pueblo, kico précis ta biba bao di e pashent”, Jayburtt Dijkhoff a splica.
