Wardacosta a duna confirmacion
- Cuatro Venezolano deteni den e caso
ORANJESTAD (AAN): E relato di Ministerio Publico relaciona cu accion riba lama pa stop un boto transportando droga, y cu DIARIO a publica caba den edicion di Diaranson, awor a ricibi extra detaye for di Wardacosta di Caribe Hulandes.
Esaki tabata e caso cu a detecta un speedboat moviendo den e anochi di Diasabra pa Diadomingo marduga den cercania di Aruba.
Segun Wardacosta, tabata Diadomingo den oranan di marduga cu a detecta un boto sospechoso nabegando den direccion di Aruba. Consecuentemente a pidi asistencia di e avion Dash-8 di Wardacosta, pa lanta vuelo pa asina por analisa e situacion.
Tripulacion di e avion a logra di verifica cu tabata trata di un boto sospechoso y a opta pa inmediatamente alerta personal di Wardacosta na Aruba pa asisti cu e caso.
Cu rapidez nan a sali den direccion Noordoost di Aruba. A bin sali na cla cu ora esnan den e boto color blauw aki a detecta cu Wardacosta ta yegando, nan a primi trot aun mas di e dos outboard engine Yamaha. Pero Wardacosta a sigui nan tras cu e Metal Shark.
Despues di un persecucion intensivo, aparentemente a logra di destrui un di e motornan. Di e forma ey e oficialnan di Wardacosta a logra di intercepta e boto, tipo peñero, cu un total di 4 persona abordo.
Tur 4 tripulante, hende homber, ta di nacionalidad Venezolano.
Riba e lancha a bin topa cu un cantidad grandi di bulto cu narcotica den nan. A confisca aproximadamente 550 kilo di droga. Autoridad no a menciona ki tipo di droga e ta contene.
Tur e personanan nan riba e boto y tambe e pakete nan di droga a ser treci bek pa e Pier di Wardacosta na Savaneta, unda nan a ser entrega na personal di KPA y mientras tanto a destrui tur droga.
Na Aruba, e investigacion y interogacion di e 4 Venezolanonan aki ta sigui.
