Edwin Jacobs, director SVb: Ora un trahado den servicio bira malo of accidenta:
ORANJESTAD (AAN) – Director di SVb Edwin Jacobs a indica, den entrevista cu DIARIO, cu na momento cu un dunador di trabao ta tuma un trahado den servicio, y cu e no ta registr’e, unico manera cu SVb por haya sa, ta via dos forma: of e trahado ta bay riba su app y wak cu e no ta registra, of si e compania ta cay den un control di SVb, su departamento di control.
“E ta bira hopi dificil si nos no haya cooperacion di e trahado, pa combati e cosnan aki, pasobra no nos tin bista ken ta tuma cual hende den servicio, tur dia.
Bo ta busca manera di concientiza e dunador di trabao, cu ta su obligacion y ta na bienestar di su trahado pa ta asegura pa den cualkier caso di malesa of accidente, e no keda desampara. Y e dunador di trabao, civilmente, por wordo poni responsable. Esaki tambe por”, Edwin Jacobs a señala.
El a splica cu na momento cu un trahado a haya un accidente laboral unda e no tabata sigura cu seguro di malesa y accidente, tin ley pa cu esaki, cu si el a keda incapacita pa resto di su bida, e dunador di trabao t’esun cu mester bay paga tur e añanan ey pasobra el a laga di cumpli cu e trahado.
“Pues, e prima ta relativamente abao pa 3.5% mensual, bo tin bo trahado sigura pa malesa y accidente. No tin ningun motibo pa no cumpli cu esaki. E forma pa hacie t’asina facil, cu basicamente no tin motibo pa bo no hacie”, Jacobs a subraya.
Dependiendo di e gravedad di e infraccion, su duracion, y si ta prome biaha of no, e multa ta core. Si e dunador di trabao ta resividista, si el a haya multa dos of tres biaha caba e multa ta keda aumenta.
Edwin Jacobs ta haci e trahadornan e peticion di down load di e aplicacion “MiSVb Trahado”, registra su mes y via e aplicacion aki e por wak si e ta sigura pa e compania unda e ta traha, y si e ta traha na mas caminda y e ta sigura pa nan tambe, y por wak e salario pa dia pa cual ta sigura, y e salario ta corecto. Si e ta mucho abao e trahado ta haya su mes perhudica en caso di un malesa largo anto tin cu constata si tambe ta corecto. Si no ta corecto por denuncia esaki. SVb ta bay haci control di manera anonimo.
