Prome Minister Evelyn Wever-Croes:
ORANJESTAD (AAN): Durante e ceremonia cortico diamars atardi dilanti Bestuurskantoor en conexion cu iluminacion di Bestuurskantoor cu luz blauw como simbolo di conscientisacion di alienacion parental, Prome Minister Evelyn Wever-Croes a enfatisa e importancia pa para keto na e tema aki y realisa cu tur mucha tin derecho di tin tur dos mayor den nan bida y re-confirma nos compromiso cu nos muchanan y sigui bringa hunto pa e bienestar y felicidad di nos muchanan.
Manera ta conoci, Aruba a yega di pasa den casonan lamentabel na unda un di e mayornan no ta permiti pa wak e yiu despues di separacion. Esaki no solamente ta doloroso pa e yiunan sino pa e mayor en cuestion, tambe ta un situacion hopi doloroso.
“Prevencion di abuso di mucha ta implica cu bo lo mester enfatisa e importancia di siña kico ta un desaroyo saludable pa mucha, apoya practicanan positivo den educacion di mucha y adopta medidanan den nomber di e muchanan y e famiannan di nos comunidad”, Prome Minister a enfatisa.
Pero kico exactamente ta alienacion parental? E ta e acto cu un di mayornan ta purba di pone un yiu of e yiunan contra di e otro mayor pa medio di manipulacion, critica of otro forma di comportamento negativo sin hustificacion rasonable.
E strategianan cu ta wordo uza den esaki ta inlcui nenga e otro mayor di tin contacto cu e mucha, critic’e, haci cu e mucha ta falta respet pa e otro mayor of kibra tur contacto cu n’e. Un mucha cu wordo indoctrina y controla ta sinti miedo y odio y consecuentemente ta rechaso e otro mayor.
𝗘 𝗣𝗥𝗘𝗚𝗨𝗡𝗧𝗔 𝗖𝗨 𝗧𝗔 𝗦𝗨𝗥𝗚𝗜 𝗧𝗔 𝗞𝗜𝗖𝗢 𝗧𝗔 𝗘 𝗢𝗥𝗜𝗚𝗜𝗡 𝗗𝗜 𝗔𝗟𝗜𝗘𝗡𝗔𝗖𝗜𝗢𝗡 𝗣𝗔𝗥𝗘𝗡𝗧𝗔𝗟?
Ora un discordia matrimonial ta yega te na odio entre pareha, masha lihe mes e pareha ta wak un divorcio como e miho opcion. Un divorcio por ta un salida facil pa e pareha pero hopi biaha e ta causa problema pa e yiunan. Divorcio no necesariamente ta e unico causante di alienacion parental.
E por sosode tambe ora e mayornan cu no ta casa y nan relacion a caba na nada, ta dicidi di laga otro. Den un divorcio of separacion di mayornan hopi cos por bay robes. Mientras un di e mayornan ta acusa e otro di manipula e mucha pa e mucha rechac’e, e otro ta argumenta cu e ta haci’e den interes di e mucha pa asina proteg’e di e otro mayor. Alienacion parental tin hopi otro factor ademas di esnan cu a menciona.
“Na Aruba ta conoci cu e incidencia di divorcio estadisticamente ta hopi halto. A yega di sosode cu den cierto aña e cantidad di divorcio tabata mas halto cu e cantidad di matrimonio. Recientemente Gobierno a cambio ley pa haci cu e tata cu reconoce su yiu automaticamente ta haya custodia tambe”, Prome Minister a finalisa bisando.
