Fundacion Savaneta a “Kwashi cu curazon” y laga masha bunita e cas di famia Angela na Savaneta 65

Norman Thijsen a relata:

ORANJESTAD (AAN) – Norman Thijsen, Presidente di Fundacion Savaneta, a relata pa redaccion di DIARIO, cu esaki ta un dia hopi importante pa e Fundacion, pero tambe pa famia Angela di e cas Savaneta 65.

Por corda cu aña pasa a cuminza un campaña yama “kwashi cu curazon” ya cu nan ta preservando e balornan cultural di Savaneta, y den e caso aki ta casnan di antaño.

Mayoria ta casnan cu tin 100 aña of mas di a wordo traha. Thijsen, mustrando un potret, a señala cu 100 aña pasa Savaneta no tabata tin caretera ni electricidad, y casi no tabata tin cas mes den e vecindario.

“Awendia, Savaneta a desaroya y tin mas movecion. Importante ta cu den e desaroyo 100 aña despues, cu nos mester wak nos identidad tambe. Nos identidad, nos tradicion y cultura mester keda intacto. P’esey e fundacion kier yuda preserva nos balornan y nos tin un campaña cu nos ta moviendo, cu nos ta drecha casnan di antaño. Nos no por drecha tur cas, pero nos ta selecta casnan cu ta hopi visible cant’i caminda. E tin di haber tambe e aspecto turistico. Esaki ta e balor cultural cu Savaneta ta ofrece na turismo tambe, entre otro, kico ta di nos”, Norman Thijsen a relata.

El a expresa cu hopi biaha turistanan kier come algo di Aruba, y Savaneta ta Aruba. El a mustra un potret pa mustra con bunita e cas a keda.

El a agrega cu tin hopi hende pa gradici pa nan ayuda como boluntario. Fundacion Savaneta no ta haya subsidio, pero e miembronan cu nan mesun forza a pone esaki wordo logra.

El a menciona e negoshinan cu a sponsor e proyecto hunto cu nan boluntarionan, cu semper tey pa nan.

“Djis pa termina, mi ta kere cu e parti di e casnan t’asina importante cu, manera mi a bisa caba, e fundacion mester yuda preserva, pasobra hopi biaha e famianan no tin e fondo completo pa haci e trabao, cu ta uno basta costoso, y ta na unda sponsor ta duna ayudo. Akinan e Fundacion ta bin duna un man, y mi ta kere cu ta un ehemplo na Aruba”, Norman Thijsen a expresa.

El a subraya cu si e bario uni, e pueblo, e comunidad uni, nan mes por hacie y no spera pa otronan hacie.