Herrick Henriquez, director:
ORANJESTAD (AAN): Herrick Henriquez, director di Aruba Trade & Industry Association (ATIA) a duna di conoce cu tin varios investigacion cu a keda haci, entre nan un cu yama 'From red tape to red carpet', cu ta un estudio haci basta aña pasa caba unda tin diferente sugerencia.
Henriquez a indica cu di banda di ATIA nan ta kere cu si e departamentonan cuminsa traha hunto y esey ta un reto cu minister di economia tabatin, ora cu kier digitalisa su departamentonan. Pero e reto a bin cu e departamentonan no ta comparti informacion y no ta comparti tur dato.
A scucha esey di otro companianan estatal tambe. E parti cu mester bay bin cu Aruba a haya 14 miyon Euro caba pa e-Government, Henriquez ta kere cu e reto number un cu ta e 'unieke nummer' cu mester bin, mescos cu Hulanda tin cu yama DigiD.
Aruba tin 'unieke nummers' caba. E ta riba e rijbewijs. E no ta e number di cedula. A compronde cu e listanan no ta bon y esey ta algo cu mester pasa door di dje, a bisa.
Banda di esaki Henriquez a sigui bisa cu pa kita 'red tape', ATIA ta kere cu e-Government ta bay yuda y kita e miedo di e ambtenaarnan cu ta bay kere cu nan ta bay perde nan trabao. E parti ey mester wordo 'retrain' pasobra hopi cos cu ta wordo haci manual un computer por haci y e persona ta bay mas den loke ta servicio na cliente.
E ora bo ta bira un empleado publico cu tey pa yuda publico y varios biaha a ser treci dilanti cu esaki ATIA ta kere den dje y cu mester pasa. A yega ora pa hacie. Tin varios caminda cu por haci mehoracion y tin departamentonan cu ta wak cu el a traha, por ehempel Censo.
Na Censo tin varios cos cu ta riba papel ainda. Pero si ta wak e parti di servicio, esaki ta mehora basta bon. Awor pa haya un papel di 5 florin esaki ta keda cla den menos di 5 minuut.
Tin pasonan cu por wordo haci pa yega na un gobierno mas eficiente y cu ta bay kita hopi di e 'red tape', Herrick Henriquez a declara.
E-Government ta den Landspakket y ta algo cu mester wordo ehecuta, a agrega.
