Fundacion Salvaguardia e Herencia Cultural di Aruba ta presenta tres obra musical

ORANJESTAD (AAN): Fundacion Salvaguardia e Herencia Cultural di Aruba (FSHCA) kier a invita Aruba completo pa e tres obranan Musical den luna di juni y juli.

E meta ta pa engrandece e mundo Teatral na Aruba y yuda e talento local truinfa local como internacional. Tur tres obra ta original y di genero Musical, dirigi pa Ferdinand Franca.

Pa luna di juni nan academia di fama, ABC performingarts Aruba KIDS, lo trece un obra musical pa nos muchanan cu titulo Robotino. E obra aki lo wordo presenta dia 21 di juni, 3 pm y 5 pm, na Scol di Arte. Esaki ta un obra cu ta conta di un Robot cu kier bira un humano. Un obra Musical pa grandi y chikito yena cu amor y amistad.

Tambe den e mesun luna, FSHCA, lo presenta e obra Musical Otro gay ta canta cu lo wordo presenta dia 24 di juni y 27 di juni. Dia 24 di juni e lo wordo presenta na Centro di Bario Savaneta pa 6 pm y dia 27 di juni nos lo presenta e obra na Scol di Arte pa 6 pm y 8 pm. Esaki ta un obra cu ta conta di e tradicion di e baile di Dera Gay y unda e gaynan lo dicidi e futuro di nan cunucu.

Pa luna di juli nos academia di fama, ABCperformingarts Aruba YOUTH, lo presenta nan showcase Musical cu titulo Our first Act! E obra Musical aki lo wordo presenta dia 7 y 8 di juli na e ballroom di Paseo Herencia. Esaki ta un obra Musical yena cu canto, baile y actuacion. Un obra pa grandi y chikito y un anochi inolvidabel pa e amantenan di Arte escenico.

Asina FSHCA ta contribui grandemente na fomenta e disciplina di Teatro na Aruba y Arte escenico. Trece obranan di nos artistanan local y actua pa nos artistanan local tanto infantil como hubenil. Asina FSHCA ta cultiva e interes di Teatro den nos mucha y hobennan y salvaguardia esaki pa e futuro generacionnan.

FSHCA kier a celebra cu henter nos pueblo Arubano nos prome lustro cu tres obranan musical pa grandi y chikito. Bin hunto cu e famia y disfruta di e obranan aki y contribui na e desaroyo Teatral na Aruba. Masha danki pa sostene nos durante un aña y nos promesa ta keda vigente pa sigui salvaguardia nos Arte y Cultura na Aruba pa nos futuro generacionnan.