ORANJESTAD (AAN): Gamma IT Solutions ta hopi orguyoso di por anuncia cu nan a wordo acredita oficialmente cu e
certificacion internacionalmente reconoci ISO 9001:2015 Quality Management System (QMS), otorga door di ISO Certifications Group.
E logro aki ta refleha e compromiso di Gamma IT Solutions pa desaroya software di alta tecnologia, mientras ta sigi mehora su procesonan y ta mantene excelencia operacional y un standard halto di satisfaccion pa su clientenan y stakeholders.
E certificacion ISO 9001:2015 ta un certificacion reconoci mundialmente pa demostra cu un organisacion tin procesonan efectivo na luga cu ta focus riba consistencia, maneho di riesgo y mehoracion continuo.
E proceso di certificacion ta envolve un audit riguroso unda ta sigura cu tur e procesonan di e compania ta cumpli cu un maneho di calidad.
Teiry Croes, Marketing Manager ta comparti “E certificacion aki ta representa un logro grandi pa nos compania y ta danki na e esfuerso, dedicacion y profesionalismo di henter nos ekipo. Nos ta sumamente orguyoso di a logra esaki.”
Gamma IT Solutions kier extende palabranan di aprecio na Stephen Geerman, fundado y managing director di AXIOMA, pa tur e guia y experticio cu AXIOMA a duna na Gamma IT Solutions durante e proceso di certificacion.
“Nos ta celebra e logro aki y nos ta reconoce cu calidad no ta un destinacion solamente pero un compromiso continuo,” Frank Baks, Director di Gamma IT Solutions ta comparti. “E certificacion aki ta prueba di nos dedicacion pa cu nos clientenan y partners pa sigi desaroya software di calidad, innovativo y di balor.”
E certificacion ISO 9001:2015 ta sigui reenforsa Gamma IT Solutions su posicion manera un partner confiabel cu por duna su clientenan e confiansa cu ta cumpli cu standards di calidad reconoci internacionalmente.
