CORRECION
ORANJESTAD (AAN): Fundacion Respeta mi, a durante e ultimo añanan ta concientizando mayornan y comunidad en general, pa cuida nos muchanan den e temporada di carnaval, pa nan tur ta safe.
Den un entrevista cu e Trahado Preventivo Shennelyn Croes di Fundacion Respeta Mi, a menciona algun punto di atencion pa tene nos muchanan safe. Seccion Hubentud den Movecion ta comparti algun di nan cu nos lectornan:
(1) Si e muchanan ta bao di cinco aña, por fabor laga nan na cas. Nan no ta goza di carnaval cu tur e elementonan manera un rato tin yobida, un rato solo ta sali kima, pues preferiblemente laga nan na cas cu un persona di confianza, cu e mucha ta confia y ta sintie confortable cu ne, Por wak cu tin hopi crèche cu ta habri nan porta pa e temporada di carnaval pa e muchanan por keda cerca nan. Pues, opcionnan tin cu por laga e muchanan mas chikito keda cas.
(2) Tambe Fundacion Respeta Mi kier pa si e muchanan bay carnaval tin bon bista riba nan. Wak unda bo ta para, percura pa tin un sombra, wak pa e muchanan no ta den peliger, pa tira bista constantemente pa nan, pa nan no cana nan so, pa no subi den e parada of si tin pleito of bringamento, of tin bebemento di alcohol, pa e muchanan no ta cerca di e vecindario ey.
(3) Tambe Fundacion Respeta Mi kier pa cuida e muchanan nan oido durante carnaval pasobra e musica ta hopi duro pa nan oido, y cu tin consecuencianan grave pa nan oido cu por keda cu ne pa semper. E ta pidi pa cumpra earplugs pa nan of acerca un instancia cu ta regala esaki durante e parada.
Fundacion Respeta Mi ta pidi pa duna e muchanan suficiente awa preferiblemente, durante e parada y cuminda saludable. No mucho refresco pasobra esaki ta deshidrata nan mas.
Percura pa e mucha bisti paña fresco y pechi durante parada di carnaval.
Fundacion Respeta Mi ta pidi pa asegura cu e muchanan ta bao un afdak, por ehemplo, tanto pa e solo pero tambe si meymey tin yobida. Tambe pa nan hunta suficiente protector solar, keda reaplica esaki cada dos ora, y tambe pa nan tin un lugar pa sosega pa nan por relax un rato di e elementonan manera e solo cu nos tin na Aruba.
