Do It Center a celebra e di 45 aniversario di Sita Peña

E cara tan conoci di General Store y awor Do It Center

ORANJESTAD (AAN): Un brindis special a ser prepara na Blossoms na Palm Beach, pa observa e logro grandi di un señora cu pa hopi decada tabata e persona principal cu ta atende publico for di epoca di General Store, y cu despues ta e cara cu semper ta saluda tur hende, na un forma masha cordial y respetabel na e.o. Do It Center Camacuri.

   E encuentro cu varios invitado, tabata pa conmemora e hecho cu 45 aña pasa, señora Sita Peña a drenta den servicio di e compania.  El a dedica un increible 45 aña na e team aki.

   Mas cu claro, famia Ponson y tur dirigente di Do It Center Aruba ta hopi orguyoso di su logro.  Pasobra nan sa di su dedicacion, su habilidad, sabiduria, y perseverancia a yuda e compania cana e caminda pa exito tambe.

   Gerencia a presenta Sita cu plaquette, regalo, y tabatin hopi bouquet, decoracion cu blaas, y presencia di colega y famia cu a observa e momento special aki.  Pa Do It Center, e trabao di Sita ta igual cu legacia di briyo y asina hopi logro te cu a perde conteo.