ORANJESTAD (AAN)—Di Stefano Wernet a asumi e posicion di Tesorero di Fundacion Rancho, den su directiva nobo.
Den entrevista cu DIARIO, durante e “soft opening”, el a bisa cu e kier yuda como boluntario, pasobra e ta kere den Playa, e ta kere den Aruba su economia, y den nos hubentud.
Di Stefano ta haya cu mester uni e barionan, scol y deporte, pa por lanta e progreso, y ser humano cu Aruba mester, unda cu henter e pueblo por biba feliz y trankilo.
“Nos tin un pandemia, berdad; pero nos tin cu acepta e retonan di nos economia. Nos tin un Fundacion Rancho, cu tin bon contacto cu CEDE, cu UNESCO, y mi ta kere cu nos mester haci mas uso di globalizacion. Globalizacion kiermen cooperacion. Kiermen, nos no tin cu depende solamente di gobierno. Nos tin un acuerdo di cooperacion tambe cu e gobierno actual, no di cen pero riba tereno di investigacion, y esey ta importante pasobra ta trata di cultura, historia. Esey tambe Fundacion Rancho ta para pe, y nos tin un directiva nobo, dinamico, y nos ta bay traha hunto den team, cu un curazon honesto y sincero”, Di Stefano Wernet a comenta.
Finalmente, el a gradici tur invitado presente pa nan acogida, prensa entre nan, y tambe pueblo di Aruba pa su sosten na Fundacion Rancho.
