Exitoso evento di Sunset Wine Experience pa sostene Jeanique de Palm

ORANJESTAD (AAN): Diaranson anochi na Patio15 na Playa, a tuma lugar un evento pa recauda fondo, organiza pa e simpatica Jeanique de Palm, kende ta e actual Reina HispanoAmericana Aruba 2021.

   Su evento titula “Sunset Wine Experience”, tabata pa recauda fondo pa asina e ta bon prepara pa certamen.

   E anochi tabata anima door di Anouk Eman y tambe Shark Gario, cu a sa di entretene publico na un forma sublime, y cada rato tabata pone sonrisa riba cara di tur esnan presente.  E waiternan di Patio15 tabata percura cu tur esnan cu a contribui, a haya un servicio sublime, cu biñanan di ATC.

   E anochi aki tabatin show di moda tambe cu varios trahe espectacular, y tambe bikini di Sunset Shack, y esaki a hala atencion.  E show tabata bon combina cu musica di Swingmasterz.

   Por a nota cu Jeanique de Palm tabata sumamente agradecido pa e sosten cu el a ricibi, y a gradici inmensamente tur esnan cu a duna un man pa a haci e evento posible.