Ginelly Quandt, coordinador ta splica:
ORANJESTAD (AAN) – Ginelly Quandt, Coordinador di Fundacion Rancho, den un conferencia di prensa a duna informacion tocante un actividad ya conoci, pero cu e luna aki ta bay ta un tiki diferente, cu presencia di dos instancia cu ta bay yuda.
Ta trata aki di e “Marshe Rancho” cu ta un actividad pa e comunidad local, unda personanan por bende nan producto y mustra kico nan ta traha na cas, sea cuminda, obra di arte of ofishi, cu ta tuma lugar tur ultimo diahuebs di luna.
E luna aki lo tuma lugar Diahuebs di e siman aki, dia 25. Pero e biaha aki, ta bay inclui dos partners cu ta CEDEHM y HIAS. Nan ta bay yuda banda di e fundacion na trece mas hende posible den comunidad pa bende nan producto y mustra kico nan habilidad ta den obra di arte, etc.
Quandt a expresa cu e ta sumamente contento, como Fundacion Rancho, cu nan por a uni cabes pa por a yega na un bunita proyecto y sigui tine pa den futuro por ofrece un actividad den e bario di Rancho y duna oportunidad na tur persona den comunidad, pa haci uso di e bunita proyecto aki.
E dama a comenta cu nan a cuminza aña pasa cu e mercado, sin musica ni mucho ambiente, pero nan a ripara cu falta ambiente anto despues nan a inclui musica den dje unda diferente banda musical a participa.
E biaha aki tambe lo tin entretenimento cu un banda local cu lo bay toca reggae. Cushina y bar lo ta bon surti. E marshe ta cuminza pa 4 or di atardi te 7 or di anochi, y lo tin un bunita ambiente pa comunidad, por disfruta di dje. El a conclui bisando cu Fundacion Rancho ta para e cultura di Rancho y Aruba henter.
