Parlamentario Ricky Hoek:
ORANJESTAD (AAN) – Den conferencia di prensa di Fraccion di MEP, Diaranzon di e siman aki, Parlamentario Ricky Hoek a participa, y a cuminza pa expresa palabranan di pabien y deseo di exito, sabiduria y animo, na tur studiante, maestro y mayornan cu apertura di aña escolar 2022-2023.
Parlamentario Hoek, seguidamente, a elabora tocante e ponemento di e prome piedra pa Stichting Hunto, cu Minister Rocco Tjon a presenta. Hoek a splica cu Hunto ta un fusion di dos stichting: FMAA y SPD y esaki ta fundamental pa yuda e adictonan ambulante y personanan cu problema di salud mental.
E decision aki a wordo tuma despues di basta aña deliberacion, pensamento y un vision cla cu nan kier a uni cu otro, pero no solamente e dos fundacionnan aki ta trahando hunto sino cu un cadena di instancianan tambe ta traha vooral, riba tereno di salud mental y adiccion.
E parlamentario a menciona, entre otro: FADA, Bureau Ondersteuning Verslavingzorg, Respaldo, Departamento di Salud Publico, y tambe e representacionnan di Ministerio di Husticia y Asunto Social.
Parlamentario Hoek ta sigur cu un union asina aki, lo mustra y lo duna posibilidadnan di miho cuido pa adictonan ambulante, y tambe pa personanan cu tin problema di salud mental.
E ta kere cu e combinacion aki ta hopi importante specialmente pa personanan cu ta wordo diagnostica cu dos malesa: adiccion y problema di salud mental.
E parlamentario a señala cu ponemento di e prome piedra pa Stichting Hunto, cu a tuma lugar dos siman pasa na Dakota, ta inicia e proyecto hopi importante aki. Esaki ta un proyecto cu tin un balor inicial di 600 mil florin, unda cu Minister Tjon a ubica e fondo aki den e presupuesto di 2022, cu a keda aproba pa Parlamento di Aruba, y asina aki ta wak e frutonan di un proyecto asina importante y necesario pa nos comunidad.
Hoek a expresa cu fraccion di MEP ta hopi conciente, y gradici tambe cu e proyecto aki, cual nan ta sostene totalmente, pasobra nan ta kere cu enberdad mester bin un cuido structural y integral, unda tur e departamentonan y instancianan aki traha hunto pa asina duna ayudo, forza y guia na e personanan adicto ambulante y cu problema di salud mental, y tambe na nan network, esta famia, y personanan cu ta traha rond di nan.
